وەزارەتی نەوتی عێراق بڵاوی كردەوە، كۆمپانیای هەڵکەندنى بیری نەوت لە عێراق، لە ماوەی نیوەی یەكەمی ئەمساڵدا ١٠٥ بیری نەوتی هەڵكەندووە، دەشڵین، لە هەوڵداین بۆ نوێكردنەوەی گرێبەستەكان بە مەبەستى هەڵكەندنی دەیان بیری نوێى دیکە.
عاسم جیهاد وتەبێژی وەزارەتی نەوتی عێراق لە بارەی هەڵكەندنی ژمارەی ئەو بیرە نەوتانەى لە ماوەی شەش مانگی سەرەتای ئەمساڵدا لە عێراق هەڵكەندراوە، بۆ میدیا عێراقییەكان دەدوێت.
عاسم جیهاد ڕایگەیاند، كۆمپانیای هەڵكەندنی نەوت لە عێراق، لە ماوەی نیوەی یەكەمی ئەمساڵدا ١٠٥ بیری نەوتی لە كێڵگە نەوتییە جیاوازەكانی وڵاتەکەمان هەڵكەندووە.
ئەوەشی خستەڕوو، كۆمپانیای هەڵكەندنی بیری نەوت پابەندە بە جێبەجێكردنی پرۆژەكان بە پێی ئەو خشتانەی بۆی دیاری كراوە، ئەمەش پاڵپشتیكردنی ئابووریی نیشتمانی بەرزتر دەكاتەوە.
وتیشى، كۆمپانیاكە بەردەوامە لە بەرزكردنەوەی توانا تەكنیكی و مرۆییەكان بۆ ئەوەی بتوانێت پڕۆژەكان بە هاوكاری لەگەڵ كۆمپانیا نیشتمانی و نێودەوڵەتییەكان جێبەجێی بكات.
لە کۆتایدا ئاماژەى بەوەکرد، لە هەوڵداین بۆ نوێكردنەوەی گرێبەستەكان بە مەبەستى هەڵكەندنی دەیان بیری نوێى دیکە.