بەشی دوانزەیەم
"ڕونكردنەوەیەك بۆ بەرچاوڕونی هەموان"
خوێنەری ئازیز:
دوای ئەوەی یانزە بەشی ئەم زنجیرە نوسینەم بڵاوكردەوە، سەرنجم دا كەسانێك نوسینەكەی
منیان بە دل َ نەبوەو بەو هۆیەوە زۆر كۆمێنتی ناشیرینیان بۆ نوسیوم. دیارە هەمو كەس
ئازادە چی دەنوسێت و هیچ نوسینێكیش بەدڵی هەموان نابێت. گومانی تێدا نییە ناوەڕۆَكی
هەمو كۆمێنتەكانیش بەچاك و خراپەوە ڕەنگدانەوەی كەسایەتی خاوەن كۆمێنتەكانە.
بە بۆچونی بەندە ئەوانەی كۆمێنیتیان
نوسیوە لە سەر ئەم نوسینەی من پەلەیان كردوەو ڕۆژگاریش زۆری بەدەمەوە ماوەو عومر
باقی بێت ڕاستی قسەكانی من لەداهاتودا بۆ هەموان باشتر ڕون دەبێتەوە. ئەم نوسینەی
من ئەنجامی كاردانەوە نییەو باسی هەر كەس و هەر شتێكم كردبێت، وەكو خۆی چۆن هەبوە
هەر بەو شێوەیە باسم كردوەو، پەیمانم بە خۆم داوە هەمیشە ڕاستگۆبم لەگەڵویژدانم و
كەسانی دەوروبەرم.
دەمەوێت ئەوەشتان پێڕابگەیەنم كە هیچ كێشەیەكی
شەخسیم لەگەڵ َهیچ كەسێك نییەو نەبوە كە لەم نوسینەدا ناوم هێناون. پەیوەندی حیزبایەتی
و سیاسەتی لێدەرچێت، هەمو ئەوانە برای عەزیزو خۆشەویستی منن. بەڵام ئەمەی نوسیومە
دەبێتە بەشێك لەمێژوی ئەم گەلەو پێویستە وەكو خۆی بنوسرێتەوە.
دیارە لێرەدا
خراپ تێگەیشتنێك هەیە كە زۆر بە گرنگ و پێویستیشی دەزانم رونكردنەوەی تەواوی لەسەر
بدەم. بەڕێزان: سەرنجم داوە زۆربەی ئەوانەی كۆمێنتی نابەجێیان لەسەرم نوسیوە ئەوانەن
كە كاك نەوشیروانیان زۆر خۆشویستوە. وا تێگەیشتون كە ئەم نوسینەم بەتایبەت بۆ دژایەتیكردنی
ئەو نوسراوە. بزوتنەوەی گۆڕان واتە كاك نەوشیروان. كاك نەو شیروان واتە بزوتنەوەی
گۆڕان. كاك نەوشیروان نەیدەشاردەو لەچەندین بۆنەداوت ویەتی بزوتنەوەی گۆڕان خۆم
داممەزراندوەو هی خۆمە، تەلەفزیۆن هی خۆمەو بچن خۆتان تەلەفزیۆن دابمەزرێنن. دواجاریش
قسەكەی ڕاست دەرچو ئەوەتا هەموی بە میرات بۆ كوڕەكانی مایەوە. كەواتە پێتخۆشبێت یان
ناخۆش كاك نەوشیروان دەبێتە سەنتەری باسەكە. منیش هاتوم باسی بزوتنەوەی گۆڕان دەكەم
لە 10 ساڵی ڕابوردودا. كەواتە بەلانی كەمەوە نیوەی باسەكە دەبێتە باسی كاك نەوشیروان.
من بە خراپە باسی
كاك نەوشیروانم نەكردوە. بوختانم بۆ دروست نەكردوە. ناوم نەزڕاندوە. من باسی كاك نەوشیروانم
وەكو چۆن هەبوە ئاوا باسم كردوە. جا ئەگەر كەسێك وەكو پێویست ئاگای لە ڕابوردو نەبوبێت
و ئەم باسەی من بەلای ئەوەوە قابیلی قبوڵ نەبێت و ناوهێنانی كاك نەوشیروان لای ئەو
كفر بێت، من تاوانم چییە؟ خۆ من نەهاتوم پێشمەرگایەتی خۆم بە ئەوان بفرۆشمەوەو منەتیان
بەسەردا بكەم. ئەوان تاوانیان چییە ئەو كاتەی من پێشمەرگە بوم ئەوان لە دایك نەبون.
بەڵام كارەسات ئەوەیە، ئەو كاتەی من لەشاخ بوم ئەوان لەدایك نەبون.
بەڵام ئێستا ئەوان
هاتون باسی خەباتی شاخ بۆ من دەكەن و رەخنەشم لێدەگرن لەزمانی خەڵكەوە. دەگێڕنەوە
كەسێك دەچێت بۆ شارو یەكێكی تریش لە شارەوە دەگەڕێتەوە. لەڕێگا توشی یەكتری دەبن. دوای
چاك و چۆنی و سڵاو لە یەكتری كردن، ئەوەی بەرەو شار دەڕوات، دەست دەكات بە گێڕانەوەی
خەبەرو باسی شار بۆ ئەوەی كە لە شارەوە گەڕاوەتەوە. ئەمەی ئێستا ڕودەدات ڕێك وەكو
ئەوە وایە.
سیاسەت دو ڕوی هەیە،
ئەو بەشەی دەكەوێتە سەر مێزەكە بەشێكی كەمی سیاسەتەو زوربەی تێی دەگەن. بەڵام بەشە
گرنگەكەی كە دەكەوێتە ژیر مێزەكەوە تەنها بەشێكی كەم ئاگاداری ئەوەن. لەڕاستیدا من
دەمەوێت خوێنەری بەڕێز لەمەبەست و ناوەڕۆكی نوسینەكەم بگات. من خۆم بڕوام بە خۆشم و
نوسینەكەشم هەیەو ئەوەی مەبەستمە ئەوەیە بەرامبەرەكەم لەمەبەستەكەم بگات. بەڵام كەسانێك
نایانەوێت تێبگەن یان نوسینەكە بەدڵی ئەوان نییە، بەلای منەوە هیچ گرنگ نییە، چونكە
دڵنیام ژمارەیەكی زۆری خوێنەرانی ئەم نوسینە زۆرباش لەمەبەستەكەم دەگەن و ئەوەش بۆ
من بەسە.
باسەكەم بەم شێوەیە
دەستپێدەكەم: دەگێڕنەوە كە دو كەس دەچنە سەر گۆڕی (ونستۆن چەرچل) بەناوبانگترین سەرۆكوەزیرانی
بەریتانیا لەكاتی جەنگی جیهانی دوەمدا. یەكێكیان دەڵێت بەخوا پیاوێكی چاكو سیاسەتمەدارێكی
زیرەكو شارەزا بو. ئەوی تریش دەڵێت: بۆ ئەم گۆڕە چەند كەسی تێدایە؟ ئەویش دەڵێت: یەك
كەسی تێدایە. ئەوی تریش دەڵێت: تۆ باسی دو كەس دەكەی نەك یەك كەس. دەستدەكات بە شیكردنەوەو
دەڵێـت: ئەگەر ئەو كەسەی تۆ باسی دەكەی پیاوی چاك بو بێت، ئەوە سیاسەتمەدار نەبوە.
خۆ ئەگەر سیاسەتمەداریش بو بێت، ئەوە ناكرێت پێی بڵێی پیاوی چاك.
ئەوەی كە سەركردەكان
لەخەڵكانی ئاسایی جیادەكاتەوە ئەوەیە خاوەنی كۆمەڵێك خەسڵەتی تایبەتین كە لەهەمو كەسێكی
ئاساییدا نییە. نمونەی ئەم خەسڵەتانە: ئاستی ڕۆشنبیری، توانای ئیدارەدان و سەركردایەتیكردنی
خەڵك، دوربینی و خوێدنەوەی پێشوەخت بۆ ڕوداوەكان، هەست كردن بە بەرپرسیاریەتی،
توانای قەناعەتپێكردنی كەسانی بەرامبەر، ئاستی كۆمەڵایەتی و چەندین خەسڵەتی تر. زۆر
جاریش بارودۆخێكی تایبەت كەسێك دەكاتە سەركردەو دەگاتە لوتكەی دەسەڵاتیش، بەڵام شایانی
ئەو پلەو پۆستە نییەو قەدەری زەمانە دەبێتە هۆكار.
لەڕاستیدا ناخی
هەمو مرۆڤەكان بەگشتی لەیەكەوە نزیكە. لەناخی هەمو مرۆڤەكاندا جۆرێك لە ئەنانیەت واتە
خۆویستی هەیە. حەزی بەوەیە لەخەڵكی تر باشترو لە پێشتر بێت لەهەمو ڕویەكەوە. حەزدەكات
خاوەنی سامان بیت، خاوەن بڕیارو دەسەڵات بێت. حەزدەكات خۆی بەسەر خەڵكەوە بادات و
لەبەر چاوی خەڵك خۆی بنوێنیت. حەز ەكات هەمیشە كۆتا قسە هی خۆی بێت. حەزدەكات خەڵك
بەگەورەی بزانن و ڕێزی بگرن و فەرمانەكانی جێبەجێ بكەن. ئەگەر بۆی بكرێت دەست بەسەر
هەمو دەوروبەریدا دەگرێت. لەناخی مرۆڤەكاندا ڕوحی داگیركاری و پاوانخوازی زۆر گەورە
هەیە.
زۆرجار زوڵمی گەورە
لەخەڵك دەكرێت. سەیرەكە لەوەدایە ئەمانە هەموی بەحەقی خۆیان دەزانن. ئەمانە خەسڵەتی
زوربەی مرۆڤەكانن بەبێ جیاوازی. بەڵام كۆمەڵێكیش بەربەست لەبەردەم مرۆڤەكاندا هەن و
ڕێگەنادەن مرۆڤەكان بەئارەزوی خۆیان هەڵسوكەوت بكەن و بڕیاربدەن و زوڵم لەخەڵك بكەن.
خۆ ئەگەر ئەو بەربەستانە نەبونایە، ژیان زۆر زەحمەت دەبو. ئەم بەربەست و ڕێگریانەش
لەمانەی خوارەوەدا خۆیان دەبیننەوە :
زۆرجار دین دەبێتە ڕێگرو خەڵك بەهۆی
پابەندبونیەوە بە دێنێك كە ڕێگای پێنادات كاری خراپ بكات. زۆر جار ترس دەبێتە ڕێگر.
زۆر جار یاساو دامودەزگاكانی دەوڵەت دەبنە ڕێگر. زۆرجار پابەندبونی بە بیروباەوەڕی
حیزبێكەوە دەبێتە ڕێگر ئەگەر بۆ ماوەیەكی كەمیش بێت. زۆرجار كەسایەتی و مەكانەتی كەسەكە
دەبێتە لەمپەڕ لەبەردەم ئەنجامدانی ئەو كارانە، چونكە خۆی بەوە نازانێت كاری لەو شێوەیە
بكات. زۆرجار عورف و عاداتی كۆمەڵایەتی دەبنە ڕێگر. زۆرجار ویژدانی ئەو كەسە دەبێتە
ڕێگر لەئەنجامدانی كاری خراپ.
دیارە سەركردەكانیش
مرۆڤن. هەمو مرۆڤێكیش كە كاری كرد هەڵەدەكات. بەڵام هەڵەی سەركردەكان زۆرجار كارەسات
بەدوای خۆیاندا دێنن و قەرەبو ناكرێنەوە. بەڵام ئەو كەسانەی كە دەبنە سەركردەو سیاسەتمەدار
بەتایبەتی لە قۆناغی رزگاری نیشتمانیدا، زوربەی ئەو سنورانە تێدەپەڕێنن و زۆرجار ئەنجامدانی
هەندێك لەو كارە دزێوانە بە پێویست دەزانن بۆ گەیشتن بە ئامانجەكان.
ئەو كەسانەی كە
دەبنە سەركردە: زۆرجار بۆ مانەوەی خۆیان، كەسانی تر دەكەنە پەیژەو پێیاندا سەردەكەون
بۆ بەدیهێنانی مەرامەكانی خۆیان. زۆرجار فەرمانی كوشتن دەردەكەن. پاكتاوی ڕكەبەرەكانیان
دەكەن. غەدر لە كەسانی تر دەكەن لەپێناوی خۆیاندا. خەڵكانی شەڕانگیز لەدەوری خۆیان
كۆدەكەنەوە بۆ ئەوەی خەڵكیان پێ بترسێنن. زۆرجار لەپێناوی بەرژەوەندی و مانەوەی خۆیانداو
لەژێر پەردەی نیشتمانپەرەوریدا، شەڕ دروست دەكەن و خوێنی هەزران كەس بە ناحەق دەڕێژن.
ئەگەر مێژوی كۆن و نوێ بخوێننەوە بە هەزاران ڕوداوی ناخۆش و سەرنجڕاكێش دەبیستن.
بابانەكان چییان بەرامبەر یەكتری كرد لەپێناوی مانەوەی دەسەڵاتی خۆیاندا.
مێژوی قاجارەكان
و ساسانیبەكان بخوێننەوە، بزانن چەند پاشاو سەركردەی مەزن چاوی كەسە نزیكەكانی خۆیان
دەرهێناوە لەسەر دەسەڵات. لەهەموی گرنگتر زوربەی سەركردەكان سامانیوڵات تاڵان دەكەن
و لەپێناوی مانەوەی خۆیاندا بەكاری دەهێنن. كەمێك سەرهەڵبڕەو چاوبكەرەوە، بەچاوی خۆت
ببینە چ دەگوزەرێت لەهەرێمی كوردستان.
سەركردەكان دڵڕەق
و بێبەزەیین، چونكە ئەگەر وانەبن كاریان بۆ ناڕوات. هەوڵ دەدەن كەسەكانی دەوری خۆیان
بكەنە سیخوڕ بەسەر یەكترەوە بێئەوەی ئەوان بەیەكتری بزانن بۆ ئەوەی ئاگایان لە هەمو
شتێك بێت. ئەگەر زانیان كەسێك خەریكە ڕكەبەرییان دەكات بێدەنگ نابن و هەوڵ دەدن ڕێگری
لێبكەن و لەناوی بەرن. ئەمانەو زۆری تریش بەشێكن لەخەسڵەتەكانی زۆربەی سەركردەكان
بێ جیاوازی. خۆ ئەگەر بێیت و لەسەر ئەم شتانە ڕەخنەیان لێبگریت یان تانەیان لێبدەی،
ئەوەندەت پاساوی بەجێ بۆ دەهێننەوە، هەر زو پەشیمانیش دەبیتەوەو پشتیوانیشیان لێ
دەكەی.
ئەمەش هەر سیاسەتە.
سەركردەكان ئەوەندە شارەزان، ڕەوایەتی بە ئەنجامدانی ئەو كارە دزێوو قێزەونانە دەدەن
لەژێر چەتری كوردایەتی و نیشتمانپەروەریدا. خۆ ئەگەر ئەمانە ئاوا بەتوانا نەبن نابنە
سەركردەو سیاسەتمەدار. من و تۆش ئاوا بەئاسانی دوایان ناكەوین. بەدەگمەن پییاوێكی
باش و بەویژدان، دەبێتە سەركردەو سیاسەتمەدار چونكە ئەو خوو رەوشتانە بۆ پیاوی باشو
بەویژدان دەست نادەن.
من لەساڵی 1961
تێكەڵاوی كاری سیاسی بوم تا ئەمڕو دەكاتە نزیكەی 60 ساڵ و تەمەنیش خەریكە ببێت بە
75 ساڵ، ئێستا لەهەندێ فرتو فێلی سەركردە سیاسییەكان تێگەیشتوم. كەواتە زۆر ئاساییە
ئەوانەی سەرەتای تەمەنیانە لەهەمو شتێك نەگەن و لەدڵسوزی خۆیانەوە توشی هەڵە ببن و
غەدریش لەمو لەو بكەن. بۆیە ئەوانەی كۆمێنتی زۆر ناشیرینیشیان بۆ نوسیوم، لێیان دڵگران
نابم، هیوادارم هەوڵ بدەن تێبگەن و پەلەنەكەن و هیوادارم تەمەنیان دریژبێت و لە هەمو
ڕاستییەكان بگەن.
بۆیە حەزدەكەم لەو
ڕاستییە بگەن سەركردەكانی ئێمەش بە كاك نەوشیروانیشەوە بێ بەش نین لەو ڕەفتارو كردەوانە،
خۆشیان زۆر لەو كارانەیان ئەنجامداوە لە پێناوی بەرژەوەندی تەسكی حیزبایەتی و بەرژەوەندی
تایبەتی خۆیان بە ناوی بەرژەوەندی گەل و نیشتمانەوە.
بۆیە ئەوانیش وەكو هەمو سیاسەتمەدارەكانی تری جیهان، نە فریشتەن و نە مەعسومن لە هەڵەو
كەموكورتی. ڕەخنە گرتن لێیان نەك كفرنییە بەڵكو پێویستە بۆ ئەوەی وریا بكرێنەوە لە
ئەنجامدانی كاری خراپ و ڕێگا نەدەین لە بری ئێمەش بیربكەنەوەو بڕیاریش بدەن، یان گەل
و نیشتمان توشی كێشەی گەورە بكەن. حەز دەكەم لێرەدا ئەمە وەبیر خوێنەری بەڕێز بهێنمەوە
بۆ ئەوەی لە ڕاستییەكان بگەن. ئەو كاتەی پۆل َبرێمەر حاكمی مەدەنی عێراق بو دوای ڕوخانی
حیزبی بەعس لە یاداشتەكانیدا ئەمەی نوسیوەو دەڵێت :
جەلال تاڵەبانی و مەسعود بارزانی داوایان
كردبو كاتێكیان بۆ دیاری بكەم كە بێنە لام بەڵام زۆر ترسام وامزانی داوای جیابونەوەو
كەركوكم لێ دەكەن، چونكە ئەوە زۆر قورس دەبو بۆمن و نەمدەتوانی ئەو داوایەیان بۆ جێبەجێبكەم.
بۆ ئاگاداری هەمو لایەك لەو كاتەدا تاكە یەك سەربازی عێراقی نەمابو. هێزی پێشمەرگەش
لەوپەڕی بەهێزیدا بو. باشە تۆ لەو كاتەدا نەتوانی كەركوك بگەڕێنیتەوە بۆ سەر خاكی
كوردستان، ئەی كەی دەتوانێت؟. لە بری ئەوەی كەركوك و ناوچەكانی تر بگەڕێننەوە سەر
هەرێمی كوردستان، هاتن بە دەستی خۆیان عەرەبیان كردە شەریك و ناوچە كوردستانیەكانیان
كردنە، ناوچە كێشە لەسەرەكان.
واتە خۆت بەدەستی
خۆت گومانت لەسەر كوردستانبونی ئەو ناوچانە بە یاسا دروست كرد. ئەوەتا لە ئێستادا
تەعریب دەستی پێكردۆتەوە. مام جەلال نەماوە، با كاك مەسعود بچێت كەرك وەرگرێتەوە.
لە درێژەی قسەكانیدا دەڵێت: بەڵام كە هاتن داوای پارەیان لێكردم و زۆر خۆشحاڵ بوم و
لە دڵی خۆمدا وتم ئەگەر كێشەی ئەوان پارە بێت زۆر ئاسانە.
سەرنجی ئەمەش بدە،
مانای وایە پارە گرنگترە لای سەركردە كوردەكان وەك لە خاكی كوردستان. ئەگەر ئەمە وانەبوایە
چۆن بە پارە دەستبەرداری كەركوك دەبون. بەئارەزوی خۆیان پارەی پێدان و لەو كاتەوە
ئێمە دەستبەرداری كەركوك بوین. بزانن ئەمە چ تاوان و چ هەڵەیەكی كوشندەیە، ئەوەتەی
كوردی عێراق هەیە لەسەر كەركوك خوێن دەڕێژێت، ئێستا سەركردەكان بە پارە بیگۆڕنەوە،
چی ناو لێدەنێی؟ هاوڵاتییەكی ئیسڕائیلی سەرۆك وەزیرانی وڵاتەكەی خۆی كوشت، هەر لەبەرئەوەی
لەگەڵ فەلەستینیەكان دانیشتوە قسەی كردوە. ئایا ئێمە هیچ كاردانەوەیەكمان هەبو بەرامبەر
بەو كارەی سەركردەكانمان؟. ئێستا هەر ڕەخنەیەك لە مەسعود بارزانی بگری، پارتی وا هەیە
بۆی بكرێت دەتكوژێت. ئێمە بەم عەقڵیەتەوە زۆرمان ماوە ببینە دەوڵەت. ئەوە موزایەدەیە
ئەمیان دەڵێ دڵی كوردستان و ئەویان دەڵێت قودسی كوردستان.
تا دەیانتوانی نەوتەكەی بە تاڵان بەرن
كەركوك دل َو قودسی كوردستان بو. ئێستاش یەكێتی پارتی یەكتری تۆمەتبار دەكەن لەسەر
فرۆشتنی كەركوك. كاكی برا كەركوك دەمێكە فرۆشراوە. مام جەلال دەچێتە كەركوك و بۆ ڕازیكردنی
توركمان و عەرەب، دەڵێ پۆستەكان 32 بە 32 دابەشبكەن. لەهەمو دانیشتنێكدا ئەم قەوانە
لێ دەدەنەوە. دونیا هاتە ڕجای مسعود بارزانی ڕیفراندۆم نەكات، هەر كردی و لە سەدا
50 خاكی كوردستانمان لەدەست دا.
ئەی جەماوەر لە كوێ نوستوەو بۆچی
كاردانەوەیان بەرامبەر مەسعود بارزانی نەبو. تكاو ڕجای دونیامان لە كاك نەوشیروان
كرد، با ئەم بزوتنەوەیە بە دامەزراوە بكەین و بیخەینە سەر سكەی خۆی، بەڵام ئەمەی نەكرد.
دواجار بزوتنەوەكە دابەش بو بەسەر دو بەرەداو لە ئەنجامدا بزوتنەوەكە لە كۆتایی تەمەنی
نزیك بۆتەوە. سەركردەكان ئەوەندە خۆیان بە گەورە دەزانن كە هەرگیز گوێ لەكەس نەگرن
و بە ئارەزوی خۆیان بڕیار دەدەن.
زۆر جار گوێمان لێ دەبێـت كەسانێك لە ڕوانگەی خۆشەویستی و دڵسۆزییان بۆ سەركردەكان
دەڵێن: من لەسەر ڕێبازی بەڕێزان مەسعود بارزانی و مام جەلال و كاك نەوشیروانم. ئەوان
ڕێبازی كوردایەتییان پەیڕەو كردوە، ئێمەش قوتابی ڕێبازەكەی ئەوانین. بەڵام ئەوە تێنەگەیشتنێكی
زۆر خراپ و دواجار ترسناكیشە، چونكە لەم ڕێگایەوە دیكتاتۆر دروست دەبێت بێئەوەی بە
خۆت بزانی، دواجار دەبیتە بت پەرست و كەسانی تر لە بری تۆ بیردەكەنەوە بڕیاریش دەدەن.
پێش هەمو شتێك كوردایەتی ڕێباز نییە. كوردایەتی ئەركێكی نیشتمانی هەمومانە.
كوردایەتی
موڵكی هیچ كەس نییە بە تەنیا. خاكی كوردستان كە لەسەری دەژین نیشتمانی هەمومانە،
دایكی هەمومانە. كەواتە ئەركی هەموشمانە بە هەمو توانەكمانەوە بیپارێزین.
هیچ یەكێك لە سەركردەكانی
ئێمە خاوەنی ڕیبَازێكی فەلسەفی نەبون، ئەوان خەباتی نیشتمانیان كردوە، ئێمەش بەشدار
بوین. ڕاستە من نە كاك نەوشیروان بوم، نە دەشبم بە كاك نەوشیروان. بەڵام تەمەنی من
نزیكی تەمەنی ئەوە. ساڵانی خەباتی ئەو نزێكی ساڵانی خەباتی منە.
ئەو چۆن كوردایەتی
كردوە، منیش بەهەمان شێوە كوردایەتیم كردوە. ئەگەر بۆ ئەو ڕێباز بوبێت، بۆ منیش ڕێێازە
و هەرگیز حەقی خۆشم نادەم بە هیچ كەس و لایەنێك. ماوەتەوە ئەوەی بڵێم ئەو زۆر لە منی زیاتر بۆ كراوە، كاریگەری زۆرتری
هەبوە. باشتری بۆ هاتۆتە پێشەوە. بەڵام گرنگ ئەوەیە منیش هەرچیم لە توانادا بوبێت
كردومە.
خیانەتیشم نەكردوە. كەواتە بۆچی ببیم بە
بت پەرست. ئەم ڕونكردنەوەیەی منیش بە مانای ئەوە نییە، جیاوازی من و سەركردەكان نییە.
ئەوان بارودۆخێكیان بۆ ڕەخساوە بون بە سونبولی ئەم نیشتمانەو لەسەرمان پێویستە ڕێزیان
لێَبگرین تا ئەو كاتەی كارەكانیان لە خزمەتی گەل و نیشتمان و قازانجی گشتیدابن. تا
ئەو كاتەی كارەكان بە باشی ئەنجام دەدەن و عەدالەت پەیڕەودەكەن.
بەڵام كاتێ ئەو سنورانەیان بەزاندو هەمو
شتێكیان بۆ خۆیانویست و ئێمە بە كۆیلەو دەروێش و خزمەتكاری خۆیان بزانن، نابێ ڕازی
بین و بێینە دەنگو بڵێین لێرەدا بوەستن و هەمو حەق و ڕاستییەكان لای ئێوە نین و ئێمەش
هەین. ئەگەر هەمو ئەوانەی لە من ناڕەحەت بون لەسەر ئەوە بوە كە ڕەخنەم لە كاك نەوشیروان
گرتوە یان زۆر ناوم هێناوە، ئەوە زۆر بە هەڵەدا چون.
كاك نەوشیروان سەركردەیەكی
كاریزما بوە، خاوەنی بۆچونی خۆی بوە كاریگەری گەورەی هەبوە لەسەر دەورو بەر. كەسێكی
خۆشەویست بوە. ڕێزو حورمەتی زۆری هەبوە لای هەمومان و ئێستاش ئەو رێزو حورمەتەی هەر
هەیە . بەڵام ئەویش مرۆڤ بوەو كاری باش و خراپی كردوە. باسكردنی كارە خراپەكانی یان
هەڵەكانی بە مانای كەمكردنەوەی ڕوڵی ئەو نابێت. ئەو پیاوە سونبولی خەباتو تێكۆشان
بوە. بەپێچەوانەوە باسكردنی هەڵەكانی دەبێتە هۆی ڕۆشنكردنەوەی بەرچاوی نەوەكانی
داهاتو بۆ ئەوەی ئەو هەڵانە دوبارە نەكەنەوە.