ئا: ئاوێنە
ئاژانسی بلومبێرگ بڵاویكردەوە، ئەو كەشتیانەی ماوەی مانگێكە چاوەڕێی باركردنی نەوتی هەرێمی كوردستان دەكەن، نائومێدانەو بەبەتاڵی دەستیان كردوە بە جێهێشتنی بەندەری جەیهانی توركی، ئەوەش وەك ئاماژەیەك بۆ ئەوەی كە بەم نزیكانە هەناردەی نەوتی هەرێمی كوردستان دەستپێ ناكاتەوە.
بەپێی هەواڵێكی ئاژانسەكە، لە كۆی پێنج كەشتی كە مانگێكە چاوەڕێی باركردنی نەوتی هەرێمی كوردستان دەكەن، لە دو رۆژی رابردودا هەردو كەشتی "نێڤەرلاند" و "ئەماكس ئەنسیم" ئاوەكانی نزیك بەندەری جەیهانی توركییان جێشتوە بەبێ باركردنی هیچ نەوتێك، بەڵام سێ كەشتییان هێشتا لە نزیك بەندەرەكە چاوەڕێن.
ئاژانسەكە ئاماژەی بەوەداوە كە ئەو پێنج كەشتییە بەكرێ گیراون بۆ باركردنی نزیكەی چوار ملیۆن بەرمیل نەوت.
بلومبێرگ هێمای بۆ ئەوەش كردوە، جێهێشتنی بەندەرەكە لەلایەن ئەو كەشتیانەوە ئاماژەیەكە بۆ ئەوەی كە بەم نزیكانە دەست بە هەناردەكردنەوەی نەوتی هەرێم ناكرێتەوە بەهۆی ناكۆكی نێوان حكومەتی پەیوەندیدارەكان.