ئا: ئاوێنە
لە دوای لێدوانە دژبەیەکەکانی نێوان بەرپرسانی کۆماری ئیسلامیی ئێران و سەرکردایەتیی پارتی ژیانی ئازادی کوردستان (پژاک)، سەرنجی چاودێرانی سیاسی ئاڕاستەی پەرەسەندنی ململانێکان و ستراتیژی هێزە ناوچەیی و نێودەوڵەتییەکان لە بەرامبەر تاران بوەتەوە.
سیامەند موعینی، ئەندامی دەستەی بەڕێوەبەری پژاک، لە چاوپێکەوتنێکدا لەگەڵ ماڵپەڕی "ئەلمۆنیتەر" بەدووری زانی کە ویلایەتە یەکگرتووەکانی ئەمریکا یان ئیسرائیل بەهۆی ناڕەزایەتییەکی ئەنقەرەوە دەستبەرداری ئامانجی گۆڕینی ڕژێمی ئێران ببن. موعینی ئاماژەی بەوە کرد کە سەرەڕای بوونی هەندێک ناکۆکی لە تاکتیکدا، بەڵام گۆڕینی سیستەمی سیاسی لە تاران وەک ئامانجێکی هاوبەشی ستراتیژی لای ئەو وڵاتانە دەمێنێتەوە.
لە وەڵامی ئەو دەنگۆیانەی باس لە بوونی هەماهەنگی نهێنی لەنێوان پژاک و تاران دەکەن، بەرپرسەکەی پژاک ئەو دەنگۆیانەی ڕەتکردەوە و ئاشکرای کرد کە لە مانگی ڕابردوودا لە نزیک شارۆچکەی مەهاباد، دوای ڕووبەڕووبوونەوەیەکی 10 کاتژمێری لەگەڵ هێزەکانی ئێران، چوار گەریلایان گیانیان لەدەستداوە. ناوبراو هەروەها ئاماژەی بە لەسێدارەدانی لانیکەم 36 زیندانی کورد لە سەرەتای ئەمساڵەوە کرد وەک بەڵگەیەک بۆ بەردەوامی ڕووبەڕووبوونەوەکانیان.
هۆشداری لە دروستبوونی گرژیی نەتەوەیی و ڕوونکردنەوە لەسەر پەکەکە
لە بەشێکی دیکەی قسەکانیدا، موعینی هۆشداری دایە دەسەڵاتدارانی تورکیا لەبەرامبەر هەوڵەکانیان بۆ هاندانی پێکهاتەی ئازەری لە ناوخۆی ئێران دژی کوردەکان، و ئاماژەی بەوە کرد کە سیاسەتێکی لەو شێوەیە دەکرێت ببێتە هۆی ئاوارەبوونی ملیۆنان کەس و خوێنڕشتن لە ناوچەکەدا.
سەبارەت بە پەیوەندییان لەگەڵ پارتی کرێکارانی کوردستان (پەکەکە)، ئاماژەی بەوە کرد کە وەک دوو لایەنی هاوپەیمان لەژێر چەتری کۆما جڤاکێن کوردستان (کەجەکە) کار دەکەن، بەڵام جەختی کردەوە کە هەر لایەنێکیان خاوەنی پێکهاتە و ئامانجی سیاسیی سەربەخۆی خۆیەتی و لە ئێستاشدا ئامانجی سەرەکیی پژاک ڕووبەڕووبوونەوەی کۆماری ئیسلامیی ئێرانە.
موعینی ئامادەیی پارتەکەی بۆ پشتیوانیکردن لە هەر هەوڵێکی نێودەوڵەتی بڕبڕەدار دەربڕی کە ئامانجی گۆڕینی سیستەمی ئێران بێت بۆ سیستەمێکی دیموکراتی، بەو مەرجەی مافەکانی گەلی کورد تێیدا بپارێزرێت.
ئەم لێدوانانەی پژاک لە کاتێکدا دێن کە عەباس عێراقچی، وەزیری دەرەوەی ئێران، لە چاوپێکەوتنێکدا ڕایگەیاندبوو دەسەڵاتدارانی ئەنقەرە ڕۆڵێکی سەرەکییان هەبووە لە ڕێگریی لە پاڵپشتیکردنی ئۆپۆزسیۆنی کورد لەلایەن هێزە دەرەکییەکانەوە.
عێراقچی ئاماژەی بەوە کردبوو کە دوای گەیشتنی زانیاری لەسەر هەوڵەکانی واشنتن بۆ تاوتوێکردنی پلانی دابەشکردنی ئێران، پەیوەندی بە سەرۆک وەزیرانی عێراق، سەرکردە کوردەکان و وەزیری دەرەوەی تورکیاوە کردووە و هۆشداری داوە لەسەر هەر مەترسییەک کە لە هەرێمی کوردستانەوە ڕووبەڕوویان ببێتەوە. وەزیری دەرەوەی ئێران جەختی لەوە کردبوەوە کە هەڵوێستی توندی تورکیا بەرامبەر ئەمریکییەکان یارمەتیدەر بووە لە پووچەڵکردنەوەی ئەو پلانانە.