كەشناسی هەرێم پێشبینی دەكات لە ئێوارەی ئەمڕۆ(هەینی)یەوە باران بارین ناوچە جیاجیاكانی هەرێمی كوردستان بگرێتەوەو تا درەنگانی شەوی سبەی (شەممە) بەردەوام بێت و سبەینێش پلەكانی گەرما چەند پلەیەك نزم ببنەوە.

ئاوێنە: بەڕێوەبەرایەتی گشتی کەشناسی و بومەلەرزەزانی ھەرێمی کوردستان لە راگەیەندراوێکدا وتی، ئەمڕۆ هەینی، ئاسمان پەڵە هەور بۆ نیمچەهەور دەبێت و لەشەودا دەگۆڕێت بۆ هەوری تەواو. لە ئێوارەدا نمەباران و بارانی مامناوەند لە سنوری ئیدارەی گەرمیان و پارێزگای هەڵەبجە دەستپێدەكات پاشان كاریگەرییەكەی زیاد دەكات و لە درەنگانی شەودا باران بارین لە زۆربەی ناوچەكانی هەرێم دەبێت كە هەندێك كات بەشێوەی لێزمە باران و هەورە تریشقە دەبێت، لەگەڵ ئەوەش ئەمڕۆ پلەكانی گەرما كەمێك بەرزتر دەبن لە چاو تۆماركراوەكانی دوێنێ.

هەر بەپێی راگەیەندراوەكە، سبەی شەممە، ئاسمان زۆربەی كاتەكان هەوری باراناوی دەبێت، باران بارین لە زۆربەی ناوچەكان دەبێت و كە هەندێك كات بەشێوەی لێزمە باران و هەورە تریشقە دەبێت.

كەشناسی وتوشیەتی، پێشبینی دەكرێت لە درەنگانی شەوی شەممە كەش سەقامگیر بێت و كاریگەری ئەو شەپۆڵە كۆتایی بێت. 

كەشناسی هێمای بۆ ئەوەش كردوە كە سبەی پلەكانی گەرما 2 تا 4 پلە نزمتر دەبن لەچاو تۆماركراوەكانی ئەمڕۆ.

كەشناسی هەرێم پێشبینی كردوە بەرزترین پلەکانی گەرمای پێشبینیکراو بۆ سبەی بەم جۆرە بن: ھەولێر: 23، سلێمانی: 20، دھۆک: 20، کەرکوک: 25، ھەڵەبجە: 19، زاخۆ: 20، حاجی ئۆمەران: 9، سۆران: 16، گەرمیان: 23 پلە.