داواكارییەكانی مامۆستایانی مانگرتوی سلێمانی لە یاداشتێكدا گەیەندرانە سەرۆك وەزیران و سەرۆكی پەرلەمانی عێراق. 35 پەرلەمانتاری عێراق پشتیوانی خۆیان بۆ داواكارییەكان دەربڕیوەو ئیمزای یاداشتەكەیان كردوە.
ئاوێنە: سۆران عومەر، پەرلەمانتاری كورد لە پەرلەمانی عێراق، ئێوارەی ئەمڕۆ یەكشەممە، لە راگەیەندراوێكدا وتی، "داواکاری مامۆستایانی مانگرتوی سلێمانیمان گەیاندە سەرۆکی ئەنجومەنی نوێنەرانی عێراق و سەرۆک وەزیرانی عێراق."
داواكارییەكان پێكدێن لە:
-پەلەكردن لە خەرجكردنی موچەی مانگەكانی 12ی ساڵی رابردو و موچەی مانگی 1ی ئەمساڵ بەیەكەوە.
-تەوتینكردنی موچەی موچەخۆرانی هەرێم لە بانكە فیدراڵییەكان.
-كردنەوەی لقی بانكەكانی رافیدەین و رەشید لە پارێزگاكانی هەرێم.
-تەرخانكردنی بەشێك لە بودجەی گشتی بۆ خەرجكردنی موچە پاشەكەوتكراوەكانی موچەخۆرانی هەرێم.
-دەستپێكردنەوەی پلەبەرزكردنەوەی فەرمانبەران.
-دورخستنەوەی موچەی موچەخۆرانی هەرێم لە پرسە سیاسییەكان.
