لە ئەنقەرە هێرش كرایە سەر وێستگەی پیشەسازیی فڕۆكەوانی توركیا و وەزیری ناوخۆی وڵاتەكەش دەڵێت: لە هێرشەكەدا كوژراو و بریندار هەن.
ئاوێنە: بەگوێرەی میدیای رەسمی توركیا، هێرشەكەی لە ڕێگەی تەقینەوە بوە لە وێستگەی پیشەسازیی فڕۆكەوانی توركیا لە ئەنقەرە.
لەبارەی هێرشەكەوە عەلی یەرلیكایا، لە پەیامێكدا لە تۆڕی ئێكس وتویەتی، "هێرشێكی تیرۆریستی" كراوەتە سەر وێستگەیەكی سەربە كۆمپانیای پیشەسازیی فڕۆكەوانی توركیاو هێرشەكەش كوژراو و برینداری لێكەوتۆتەوە.
بەپێی میدیای رەسمی توركیا لە دوای تەقینەوەكە لە نزیك دەروازەی ئەو وێستگە پیشەسازییەی دروستكردنی فڕۆكە، دەنگی تەقەكردن بیستراوەو هێزە ئەمنییەكان تیمەكانی ئاگركوژێنەوەو فریاگوزاری پزیشكی رەوانەی شوێنەكە كراون.
هێرشەكە لەكاتێكدایە كە ماوەی چەند رۆژێكە لە توركیا باس لە هەوڵەكان بۆ دەستپێكردنەوەی پڕۆسەی چارەسەری كێشەی كورد دەكرێت و لەو چوارچێوەیەشدا داوا دەكرێت عەبدوڵا ئۆجەلان، رێبەری پارتی كرێكارانی كوردستان ئازاد بكرێت.