وتەبێژی سەرۆك وەزیرانی ئیسرائیل رایگەیاند، ئەمڕۆ شەممە، لە لوبنانەوە بە درۆن هێرش كرایە سەر ماڵی سەرۆك وەزیران بنامین نەتەنیاهۆ بەڵام لەكاتی هێرشەكەدا خۆی لە ماڵ نەبوە.
ئاوێنە: وتەبێژی سەرۆك وەزیرانی ئیسرائیل، لە راگەیەندراوێكدا وتی، بە درۆنێك هێرش كراوەتە سەر ماڵی بنیامین نەتەنیاهۆ، سەرۆك وەزیرای ئیسرائیل لە شاری قەیسەریە لە باكوری ئەو وڵاتە.
بەپێی قسەی وتەبێژەكە، لەكاتی هێرشەكەدا نەتەنیاهۆ و ژنەكەی لە ماڵ نەبون و هێرشەكە هیچ بریندارێكی لێ نەكەوتۆتەوە.
بەرلەوە سوپای ئیسرائیل لە راگەیەندراوێكدا وتی، بەرەبەیانی ئەمڕۆ شەممە، لە باكوری لوبنانەوە سێ درۆن ئاڕاستەی شاری قەیسەریەی ئیسرائیل كراون.
سوپای ئیسرائیل ئاماژەی بەوەشدا، یەكێك لە درۆنەكان بەر بینایەك كەوتوەو دوانەكەی تر خراونەتە خوارەوە.