ئا: ئاوێنە
کۆمیسیۆنی باڵای سەربەخۆی هەڵبژاردنەکانی عێراق تیروپشک بۆ ژمارەی بەربژێرو لیستەکان بۆ هەڵبژاردنی پەرلەمانی کوردستان دەکات، ئەمە لەکاتێکدایە پارتی بایکۆتی هەڵبژاردنی پەرلەمانی کوردستانی کردووە، کەوا بڕیارە لە١٠ی حوزەیرانی داهاتوودا ئەنجام بدرێت.
ماوەی ٦ سالە هەڵبژاردنی پەرلەمانی کوردستان نەکراوەو ماوەی ١٠ ساڵیشە هەڵبژاردنی ئەنجومەنی پارێزگاکانی کوردستان ئەنجام نەدراوە، ئەمە لەکاتێکدایە لەماوەی ٣٣ ساڵی رابردوودا ٥ جار هەڵبژاردنی پەرلەمانی کوردستان ئەنجامدراوە، ئەمەش ئەوە دەسەلمێنێ کە دەسەڵاتی یاسادانان لەهەرێمدا پەراوێزخراوەو پابەند نەبوون بەوادەیەکی دیاریکراوەوە بۆ هەڵبژاردن وایکردووە کە دادگای بالای فیدرالی عێراق درێژکردنەوەی ماوەی خولی شەشەمی پەرلەمانی کوردستان بە"نادەستوری" لەقەڵەم بدات‌و ماوەی نزیکەی ساڵێکە هەرێمی کوردستان بەبێ بوونی ئەنجومەنی یاسادانان دەڕوات بەڕێوەو حکومەتی هەرێمی کوردستانیش حکومەتێکی کاربەڕێکەرە.
پارتى پێشتر زیاتر لەهەموو لایەنەکان پێداگرییان لەسەر پێویستی ئەنجامدانی هەڵبژاردن دەکرد، بەڵام لەدوای بڕیارەکەی دەدگای فیدرالی سەبارەت بە"نادەستوری"ی ١١ی کورسی کۆتای پێکهاتەکان کە بڕیارێکی تەواو دژ بە بەرژەوەندی پارتییە، هەروەها کردنی هەرێمی کوردستان بە٤ بازنەی هەڵبژاردن‌و سەرپەرشتی کردنی پرۆسەی هەڵبژاردن لەلایەن کۆمیسیۆنی هەڵبژاردنی عێراقەوە، پارتى پاشەکشەى لەهەڵبژاردن کردو رایگەیاند بەشداری لەهەڵبژاردنێکدا ناکات کە لەلایەن وڵاتی دیکەوە دیزاین کرابێت.
لەهەڵبژاردنی ئەمجارەدا چەند لیست‌و هاوپەیمانییەکی نوێ رکەبەریی دەکن بۆ بەدەستهێنانی کورسییەکانی پەرلەمان.
بە گوێرەى کۆمیسیۆنى باڵاى سەربەخۆى هەڵبژاردنەکانى عێراق 96 لیست بۆ هەڵبژاردنی خولی شەشەمی پەرلەمانی کوردستان تۆمارکراون و 10 پارت و دوو هاوپەیمانى و 587 بەربژێرى سەربەخۆ ناویان بۆ بەشداریى هەڵبژاردنەکان تۆمارکردووە.
تائێستا ئەنجامەکان بەمشێوەیەن:
یه‌كێتی نیشتیمانی كوردستان ژماره 129ی پێدرا
به‌ره‌ی گه‌لی لاهور شێخ جه‌نگی ژماره 169ی پێدرا
ره‌وتی هه‌ڵوێست به سه‌رۆكایه‌تی عه‌لی حه‌مه‌ساڵح ژماره 161ی پێدرا
بزوتنه‌وه‌ی ئیسلامی كوردستان ژماره‌ی 123ی پێدرا
نه‌وه‌ی نوێ ژماره 157ی پێدرا
به‌ره‌ی توركمانی عێراقی ژماره 149ی پێدرا
هاوپه‌یمانی نیشتیمانی ژماره 162
هاوپه‌په‌یمانی سه‌رده‌م ژماره 164ی پێدرا
هاوپه‌یمانی هه‌رێمی كوردستان ژماره 133ی پێدرا
یه‌كگرتوی ئیسلامی كوردستان ژماره 148ی پێدرا
بۆ هه‌ڵبژاردنی په‌رله‌مانی كوردستان، بزوتنه‌وه‌ی گۆڕان ژماره 114ی پێدرا
كۆمه‌ڵی دادگه‌ری كوردستان ژماره 147ی پێدرا