ژوری بازرگانی و پیشەسازیی دهۆك لەبارەی بایكۆتی كاڵای ئێرانییەوە، رایگەیاند، بەهۆی هێرشەكەی سوپای پاسداران بۆ سەر هەولێر، بەدوای بازاڕی جێگرەوەدا دەگەڕێن و هەوڵ دەدەن شوێنی بەرهەمی ئێرانی، بە بەرهەمی ناوخۆیی و وڵاتانی دیکەی ناوچەکە و جیهان پڕبکەنەوە.
ئاوێنە: ژوری بازرگانی و پیشەسازیی دهۆك، ئەمڕۆ شەممە، لە راگەیەندراوێكدا وتویەتی، "لەبەر ئەوەی ژمارەیەکی زۆر بەرهەمی ئێرانی لە بازاڕەکانماندا هەن، ئێمە لە ژوری بازرگانی و پیشەسازیی دهۆک بەوردی لێکۆڵینەوە لەسەر دۆزینەوەی بازاڕی جێگرەوە بۆ بازرگانەکانمان دەکەین".
وتوشیەتی"هەوڵدەدەین شوێنی بەرهەمی ئێرانی، بە بەرهەمی نێوخۆیی و وڵاتانی دیکەی ناوچەکە و جیهان پڕبکەینەوە."
ئەوەش لەكاتێكدایە كە شەوی رابردو، ژوری بازرگانی و پیشەسازیی هەولێر لە راگەیەندراوێکدا داوای لە بازرگان و هاونیشتمانییان کرد هاوردەکردن و بەکارهێنانی کاڵای ئێرانی بایکۆت بکەن.