لە پەراوێزی ھەوڵەکان بۆ پێکھێنانی کابینەی نوێی حکومەتی ھەرێمدا...
پێشەکی
ئاشکرایە ململانێی نێوان ھەردوو بنەماڵە و دەسەڵاتی(( بارزانی و تاڵەبانی)) بە ئاشکرا و نھێنی لەساڵی ١٩٦٤وە سەریھەڵداوە و بەتایبەتیش لەدوای کۆنفرانسی ماوەت لە ٤/٤/١٩٦٤دا بەئاشکرا جیابونەوە ڕوویدا، لەسەر دەسەڵات و شێوازی حوکمڕانی و بۆتە ململانێیەکی مێژوویی و تائێستا ٦١ ساڵە بەردەوامە و بەدرێژایی ئەو مێژووە لەمیانەی ھەردوو شۆڕشی ئەیلول و شۆڕشی نوێی گەلەکەمان و لە قۆناغی حوکمڕانی و دەسەڵاتی کوردیشدا لەدوای ساڵی ١٩٩٢وە تاکو ئێستا،چەندین شەڕی ناوخۆ و کارەسات و نسکۆ و شکست و ماڵوێرانی و پەلکێشکردنی سوپای داگیرکارانی ئێران و تورکیا و سوریا و عێراقیشی تێکەوتوە بۆ نەھێشتن و بچووکردنەوە و نەمانی ئەویتریان.کە ھەموانیان دەچنە چوارچێوەی بەداخەوە ((خەمساردی و بێباکی))ەوە ولەو پێناوەشدا بەھەزاران ڕۆڵەی ئەم میلەتە بونەتە قوربانی و جەرگی ھەزاران دایک و خوشک و خێزان سوتێنراوە و بەھەزاران ڕۆڵەی ئەم گەلەیان ھەتیو خستوە.
بیانووی ململانێکان
ڕەنگە لەلایەک ململانێکە بەناوی دژایەتی خۆسەپاندن و قۆرخکاری و تاکڕەوی و گەندەڵی و بەھەدەر دانی سەروەت و سامان بێت لەلایەن بارزانیەکانەوە ھەر لەسەرەتای شۆڕشی ئەیلولەوە لەساڵی ١٩٦١ وە تاکو ئێستای حکومەتی ھەرێمی کوردستان لە ساڵی ٢٠٢٥دا ،یان ململانێی حیزبایەتی بێت لەنێوان بیروباوەڕی دواکەوتوو و عەشایەری و نەخوێندەواری و ئاغا و دەرەبەگ و کۆنەپەرستی لەگەڵ ڕۆشنبیران و تێکۆشەرانی ھوشیار و پێشکەوتوخواز و دیموکراسی خواز لەنێوان باڵی مەلایی و جەلالیدا.
جا ھەریەکەش بیانووی خۆی ھەیە بۆ سەرھەڵدان وبەردەوامیدانی بەو ململانێیانە وھیچ لایەکیشیان نەرمی نانوێنن وخۆیان لەسەر ھەق دادەنێن و سازشناکەن بۆ یەکتری.
کەی ئەم ململانێیانە کۆتایی پێدێت؟
بەڵام ئایا ئەم ململانێیە و ئەم کێشە و گرفت و ماڵوێرانیەی کورد لە باشووردا نابێت کۆتایی پێبێت ؟ و لە خاڵێکدا ڕابوەستێت و پڕۆسەی ئاشتی و ئاشتبونەوە دەستپێبکات لەپێناو بەرژەوەندی ئێستا و ئایندەی ئەم میلەتەدا و ڕاوەستانی شەڕ و جەنگی خوێناوی و فرمێسک ڕشتن!ئایا دەکرێت تا ڕۆژی کۆتایی ھەر بەردەوام بێت؟و نەوە دوای نەوە دەستاودەست بکات؟
پێشنیار و بیرۆکە نامۆ وبوێرەکە...بەڵام ستراتیژی
بۆیە بەندە پێم وایە کە دوای ٦١ ساڵ لە ململانێ لەنێوان نەوەی یەکەم باپیران ،ھەردوو بەھەشتی ((مەلا مستەفا بارزانی و مامۆستا برایم ئەحمەد)) و دواتر باوکان نەوەی دووەم(( بەھەشتی مام جەلال و کاک مەسعود بارزانی)) و ئێستاش نەوەی سێھەم کوڕەکان بەڕێزان ((باڤڵ تاڵەبانی و مەسرور بارزانی))دا کە دەبێت کۆتایی بەم ململانێیە بھێنرێت و بەگیان و ڕۆحیەتێکی سەردەمیانە و نوێگەرایی و بەپاڵنەری پەرۆشی و خەمخۆری بۆ ئێستا و ئایندەی ئەم دەسەڵات و نەوەکانی ئەم ھەرێمە و تەواوی کوردستانی گەورەشدا،ھەنگاوێکی بوێرانە و ڕاستگۆیانە لەھەردوولاوە ھەڵبنرێت بەو ئاڕاستەیە.
لەلایەن ھەردووک لە بەڕێزان باڤڵ تاڵەبانی و مەسرور بارزانیەوە وەکو دوو کاراکتەری بەھێز و دەستڕۆیشتوو لەناو یەکێتی و پارتیدا،چونکە لانی کەم ئەم دوو کاراکتەرە بۆ دەساڵی ئایندە بوون و مانەوەیان لەناو حیزبەکانیاندا بۆتە ئەمری واقیع گەر ڕووداوی لەناکاو ڕوونەدات.بۆیە بۆ ئەم قۆناغە و بۆ ئایندەش لێپرسراوێتیەکی گەورەیان دەکەوێتە ئەستۆ کە لە مێژووی خەباتی کوردایەتیدا لە باشووری کوردستاندا بە نەمری دەمێنێتەوە.و وەک پاککردنەوەی ڕابووردوو و ئازادکردنی گەردنی باو و باپیران و خۆشیان تۆماردەکرێت.
پلانی سەرخستنی بیرۆکەکە
ئەم بیرۆکەیە ناتوانرێت لەشەو و ڕۆژێکدا ئەنجامبدرێت،دەکرێت قۆناغ بەقۆناغ و ھەنگاو بەھەنگاو سەربخرێت،وەک:
• سەرەتا وەک نیازپاکی وھێورکردنەوەی دڵ و دەرونەکان و ڕێگەخۆشکردن بۆ قۆناغی داھاتوو، و متمانە دروستکردن بەیەکتری،ئەنجامدانی ڕێکەوتنێکی ستراتیژی نێوان ھەردوولا وەک دوو حیزبی جیاواز بەڵام ھاوکار و تەواوکاری یەکتر لەسەر سەرجەمی بوار و کەرت ولایەنەکانی ژیان و گوزەرانی کۆمەڵگا لە سیاسی و ئابوری و ئەمنی و پێشمەرگایەتی و کۆمەڵایەتی و دەسەڵات و حوکمڕانی و حکومەت...ھتد.بۆماوەی ٨ ساڵ((دوو خولی پەڕلەمانی)).
• لەماوەی ئەو ٨ ساڵەدا وەک یەک تیم کاربکەن لەناوخۆی حکومەتی ھەرێم و عێراق و ناوچەکە و دونیاشدا،دواتر ھەنگاوبنێن بۆ لێکنزیکبونەوەی زیاتر لە نێوان ھەردوو حیزبدا،وەک یەکەم ھەنگاویش تێکەڵکردنی ئۆرگانە سەرکردایەتیەکانیان.
• دوا قۆناغیش دەکرێت گەر بەپێویست زانرا وھەردوولا متمانەیەکی کۆنکرێتیان لەنێواندا دامەزرا،ھەردوو حیزب لە ژێر ناو و دروشم و بەرنامە و پەیڕەوێکی ناوخۆیی نوێدا یەکبگرن.
ئیدی بەم ھەنگاوە کۆتایی بە ململانێکان دێت و بەتەواوەتی بنەبڕ دەبێت و بۆ ھەتا ھەتایە ئەم پارچەیەی باشوور بەیەک و یەکگرتوویی و بەھێزی دەمێنێتەوە و ترس و دڵەڕاوکێکان و دەستێوەردانەکان نامێنن. و یەک پەڕلەمان و یەک حکومەت و یەک ھێزی پێشمەرگە و یەک ئیڕادەیی دێتەکایەوە.
بڕیاری گەورە و سەخت وچارەنووسساز...سەرکردەی گەورەی گەرەکە
ئاشکرایە بڕیار و ھەنگاوی گەورە و چارەنوسساز لە پیاوانی کاریزما و سەرکردە و ڕابەرە مەزنەکانەوە دەردەچێت و دەبێتە ھۆکاری گۆڕانکاری و خاڵی جیاکەرەوە لەنێوان دوو قۆناغدا.بۆیە ھەردوو ئەو کاراکتەرانە لە ئێستادا بەھێزترینن و ھەردووکیشیان گەنج و پێگەیشتوو و تێگەیشتوون لە سیاسەت و ئیدارە و دیبلۆماسیەتدا و ناسراویشن لەسەر ئاستی ناوخۆ و ناوچەکە و دونیاشدا.بۆیە تەمەنیان تەمەنی کارکردن و وەرگرتنی بڕیار و ھەڵوێست و گوتاری مێژوویی و گەورەیە.نەک بەردەوامبوون لەسەر ململانێ و ناکۆکیە بێزەنتیەکانی ڕابووردوو و درێژەپێدان بە ڕێچکەی ھەڵەی باو و باپیرانیان.
ئاشتی ...بژاردەی سەرکردە بەھێزەکانە
ئاشکراشە بڕیاری ئاشتی و ئاشتبونەوە کار و بژاردەی پیاوانی گەورە و بەھێزەکانە نەک لاواز و بێدەسەڵاتەکان،ڕاکێشانی دەستی ئاشتی و دەستپێشخەری بۆ ئاشتی و ئاشتبونەوە ھیچ کات مانا و نیشانەی لاوازی نیە و نابێت.جا کامیان دەستپێشخەری بۆ ئاشتی بکەن ئەوەیان بوێر و ئازا و ئازاد و خەمخۆر و ئاشتیخوازە.
بۆیە ئەم ھەنگاو و بڕیارە بەدڵنیایی قورس و سەختە بۆ ھەردوولایان،بەڵام چارەنوس و قەدەری میلەت و کوردایەتی لەھەموان پیرۆزتر و بەرز و باڵاترە، ئیدی نەک کاتی ئەو ھەنگاو بڕیارە گرنگ و چارەنووسازە ھاتوە بەڵکو زۆر دواشکەوتوە.
ھەربۆیە ئەم بڕیارە گرنگ و چارەنووسسازە ھەردەبێت بدرێت، وەک چۆن خاڵی سەرەتا و دەستپێکی ھەبوە پێویستە خاڵی کۆتایشی ھەبێت،جا شانازی بۆ ئەو سەرکردەیەی کە شەرەفی کۆتایپێھێنانی ئەو ململانێیەی دەبێت. بەپێچەوانەوە گەر کۆتایی پێنەھێنرێت ئەوا نەک ٦١ ساڵ بەڵکو درێژدەبێتەوە بۆ ١٤٠٠ساڵ وزیاتریش وەک ئەوەی لەنێوان سونە و شیعەی ئیسلامدا ھەیە ،جا بۆئەوەی نەبێتە ((کراسەکەی عوسمان و خوێنی ئیمامی حوسەین)) وەکو بیانوییەک بۆ تۆڵەسەندنەوە و بەڕەوا و ناڕەوا بەکارنەیەت. پێویستە ئەم ھەنگاوە ھەڵبنرێت.
بیرۆکەی نامۆ...دژبەری گەورە ھەیە
ڕەنگە ئەم بیرۆکە و پێشنیارە بەلای زۆرینە و خودی ئەو دوو کاراکتەرەشەوە نامۆبن لە م قۆناغە پڕ ململانێیانەدا،بەڵام لەمێژوودا زۆرێک لەخەون و ئاواتەکان ھەروا ھاتونەدی و بونەتە مایەی گۆڕانکاری گەورە و گەشە و پێشکەوتن و خۆشگوزەرانی و دامەزراندنی دەوڵەتەکان لە جیھاندا.ھەربۆیەش ھیچ پلان و خەون و بیرۆکەیەک موستەحیل و نەکردە نین گەر نیەت و پلان و ڕاستگۆیی و بوێری و پێنان بەبەرژەوەندیە کەسی و حیزبیە بچوکەکاندا ھەبێت لەھەردوولاوە.
بەدڵنیایش ئەم بیرۆکەیە،لەلایەن داگیرکارانی کوردستانەوە دژایەتی دەکرێت،چونکە ئیدی ھۆکارێکیان نامێنێت بۆ دەستوەردان لەکاروباری ناوخۆی ھەرێم،لەولاشەوە بەرەیەکی دژایەتی لەناو خودی ھەردوو سەرکردایەتی و بنەماڵە و بنکە جەماوەریەکانیانەوە دروست دەبێت.ڕەنگە لەناو جەماوەر و تەنانەت حیزب و سەرکردە سیاسیەکانی تریشەوە دژایەتی بکرێت.ھەریەکەیان بەبیانووی جیاواز و لە پێناو پاراستنی بەرژەوەندیەکانیاندا.
ھۆکارەکانی ئەم بیرۆکەیە
بەندە لە خەمخۆری و پەرۆشیم بۆ یەک و یەکگرتوویی ڕیزەکانی گەلەکەمان لەم ھەرێمەدا و بۆ خۆسازدان بۆ قۆناغە مەترسیدارەکانی ئایندەی ناوچەکە و پارێزگاریکردن لەم دەسکەوت و ئەزمونی ٣٤ساڵەی کوردایەتی لەباشووردا وەک ئەزمونێکی گەشاوە وپڕدەسکەوت سەرەڕای کەموکوڕی وڕەخنە و گلەییەکانیش، ویستم کە ئەم دەستپێشخەرییە و ئەم ھەنگاوە ھەڵنێم،کە ڕەنگە بەلای زۆرینەوە نامۆ بێت.بەڵام دڵنیام گەر سەرکەوتووبێت بۆ ھەتاھەتایە ئەم ھەرێمە دووردەکەوێتەوە لەمەترسی بچوکبونەوە و نەمان و لەناوچوون و ئایندەشمان زیاتر و زیاتر ڕوونتر دەبێتەوە.چونکە ئەم ململانێ درێژخایەنە سەرچاوەی ھەموو کێشە و گرفت و نەگەیشتن بە ئامانجە سەرەکیەکانمانە لە ڕزگاربوون و سەربەخۆبوونمان لەم بەشەی کوردستاندا.
بەو ھیوایەی ئەم بیرۆکەیە ببێتە ھۆکاری کردنەوەی دەروازە و دەرگایەکی فراوان بۆ مشتومڕکردن و ئاڵوگۆڕی بیروڕا لەنێوان ھەردوو کارەکتەری سەرەکی و سەرکردایەتی ھەردوو حیزبەکەیان و دواتریش لایەن و سەرکردە سیاسیەکان وجەماوەر و ڕۆشنبیران و کەسایەتیەکانی کۆمەڵگای کوردەواریش.