نێچیرڤان بارزانی، سه‌رۆكی هه‌رێمی كوردستان و ئه‌حمه‌د شه‌رع، سه‌رۆكی راگوزه‌ری سوریا له كۆبونه‌وه‌ی نێوانیاندا له توركیا، تاوتوێی دۆخی كورد له سوریا ده‌كه‌ن و هه‌روه‌ها گفتوگۆ له‌باره‌ی دۆخی ناوچه‌كه ده‌كه‌ن.
ئاوێنه: سه‌رۆكایه‌تی هه‌رێم له راگه‌یه‌ندراوێكدا وتی، ئەمڕۆ چوارشەممە، نێچیرڤان بارزانی، سەرۆکی هەرێمی کوردستان و ز ئەحمەد ئه‌لشەرع، سەرۆکی راگوزه‌ری سوریا لە پەراوێزی لووتکەی ئاووهەوا لە ئەنتالیای تورکیا، دیدارێکیان ئه‌نجام دا.
به‌پێی راگه‌یه‌ندراوه‌كه، له دیداره‌كه‌دا، پەیوەندییەکانی سووریا لەگەڵ عێراق و هەرێمی کوردستان، پەرەپێدان و فراوانکردنی بوارەکانی هاریکاری و هەماهەنگی، بە جۆرێک لە خزمەت بەرژەوەندییە هاوبەشەکاندا بێت، تاوتوێ کران.
ئه‌وه‌ش خراوه‌ته‌ڕو، ده‌رباره‌ی ڕەوشی ناوچەکە، هەردوولا جەختیان لە گرنگیی گفتوگۆ و ڕێگەچارەی ئاشتییانە و دیپلۆماسی بۆ چارەسەرکردنی کێشە و ئاڵۆزییەکان کردەوە.
به‌پێی راگه‌یه‌ندراوه‌كه‌ی سه‌رۆكایه‌تی هه‌رێم، دۆخی کورد لە سووریا ته‌وه‌رێکی دیکه‌ی دیداره‌که بوو. تیایدا نێچیرڤان بارزانی جەختی لە گرنگیی پاراستنی مافه‌کانی کورد و دەستەبەرکردنیان له دەستووری سووریادا کردەوە. هه‌روه‌ها هیوای خواست ئه‌حمه‌د شه‌رع له داهاتوویه‌کی نزیکدا سه‌ردانی به‌غدا و هه‌ولێر بکات.
سه‌رۆكایه‌تی هه‌رێم وتویه‌تی، چەند پرسێکی دیکەی جێی بایەخی هاوبەش، تەوەرێکی دیکەی دیداره‌که بون.