ڕاپۆرتێکی ڕۆژنامەوانیی بەریتانی ئاشکرای دەکات کە حکومەتی عێراق بە سەرۆکایەتیی عەلی زەیدی، سیاسەتێکی «خۆپارێزی و هاوسەنگی» پەیڕەو دەکات؛ ئەوەش لە نێوان ویلایەتە یەکگرتووەکانی ئەمریکا و وڵاتانی کەنداو لەلایەک و گرووپە چەکدارەکانی نزیک لە ئێران لەلایەکی ترەوە.

ئاوێنە: بە پێی ڕاپۆرتێکی ماڵپەڕی «ئەمواج»، سەرۆک وەزیرانی عێراق پێش سەردانەکەی ئەم دواییەی بۆ واشنتۆن، لەگەڵ شاندێکی حزبوڵڵای لوبنانی کۆبووەوە و تێیدا ئامادەیی عێراقی دەربڕیوە بۆ میوانداری و ئاسانکاریکردنی گفتوگۆی ڕاستەوخۆ لە نێوان ئەو حزبە و ئیدارەی ئەمریکادا.

ڕاپۆرتەکە ئاماژە بەوە دەکات، ئەمریکا گوشارەکانی لە بەغداوە تا دیمەشق و بەیروت بۆ سەر حزبوڵا چڕکردووەتەوە و لەم چوارچێوەیەشدا، دوو ڕووداوی گرنگ جێگەی سەرنج بوون کە ئەوانیش، لە ناوەڕاستی تەممووزدا، وەزارەتی دارایی عێراق بە بێدەنگی فەرمانی بە بانکەکان کرد کە سزاکانی وەزارەتی گەنجینەی ئەمریکا بەسەر کەسایەتی و کۆمپانیا پەیوەندیدارەکانی حزبوڵادا جێبەجێ بکەن.

هەروەها لە ١٦ـی تەممووزدا، گومرگی سووریا دەستی بەسەر بارهەڵگرێکی گواستنەوەی نەوتدا گرت کە بڕێک چەکی تێدا شاردرابووەوە و گومان دەکرێت لە عێراقەوە بەرەو لوبنان ڕواندرابێت.

لە کۆتایی ڕاپۆرتەکەدا هاتووە کە پێدەچێت دۆناڵد ترەمپ دەرگای بۆ ئەم نێوەندگیرییەی عێراق بە کراوەیی هێشتبێتەوە؛ چونکە ناوبراو لە ٢١ـی تەممووزدا ڕایگەیاندووە کە ئامادەیە گفتوگۆ لەگەڵ سەرکردەکانی حزبوڵا بکات، بەو مەرجەی جۆزێف عەون، سەرۆکی لوبنان، ئەو هەنگاوە بە یارمەتیدەر بۆ چارەسەرییەکان بزانێت.