رەنگە نەتوانی کێوێک بگوازیتەوە، بەڵام بێگومان توانای گۆڕینی ئاراستەیەکی چەوت و پڕکێشەو ئاڵۆزو ناشرینت هەیە.

گۆڕینی ئاراستەیەکی چەوت و ناشرین،  بە نکۆڵیکردن لە بوونی کێشەکان و کەڵەکەبوونیان  هیچی لێ شین نابێت.

نکۆڵیکردن یا گاڵتەکردن بە عەقڵی ئەم و ئەو و سەرخستنە ژێر بەفر و گوێچکەداخستن بۆ نەبیستنی حەقیقەت، بەرلەهەمووکەس فێڵ کردنە لە خۆت….بە هەدەردانی رەنجو ماندووبوون و بەبادادانی دەسکەوتەکانە لە چاوترووکانێکدا یا لە چرکەساتێکی چاوەروان نەکراوی ناخ هەژێندا.

کەڵەکەبوونی کێشەوگرفت سەرباری ئەوەی لە ئێستای ئاڵۆزکاودا دەرفەتی هەناسەدان و پشوو وەرگرتنی کاتیت پێ نابەخشێت، بێگومان لە دوورمەودادا  ئەوەندە بەرچاوروونیەی هەشتە لێتی زەوت دەکات و دەتخاتە سەر دووڕیانی چەند بژاردەیەکی نەخوازراوو وەلانانی بژاردە دڵخوازەکەتەوە…

ئەمەش بەهۆی زیاتر ئاڵۆز بوون و تەماوی بوونی دۆخەکە و فریانەکەوتنت بۆ پڕژانت بەسەر کۆی گشتی دۆسیەی کێشەو گرفت و ئاستەنگەکانەوە.

وێنەکە دیارو رۆشنە:
پەردەهەڵماڵین لەسەر چەوتی و چەوتەکان و دەستوبرد کردن لە هەڵێنانی هەنگاوە کاراکان و رووخاندنی دیوارەکان و کورت کردنەوەی مەوداکان لە پێناو پاراستنی ئاشتی کۆمەڵایەتی و هێنانە کایەی سەقامگیری و دۆخی دڵنیایی و بەرگرتن لە تەوژمی هەژمونی نەخوازراوەکان،…

لە پاڵ ئەمەشدا،  ئامادەیی هەست کردن بە بەرپرسیارەتی فعلی و سەرخستنی تواناکان و  تۆخ کردنەوەی بەها جوانەکانی گەرەکە، نەک دووبارەکردنەوەی وتاری بارگاوی کراو بە جوانیەکانی رابردوو.