لەم ڕۆژانەدا نوێترین بەرھەمی نووسراوی نووسەر و پەروەردەکار(ڕەووف ئالانی)لە ئێوارە کۆڕێکدا بەئامادەبوونی خوێنەران و پەروەردەکاران و نووسەران ئاشنا کرا.
(ڕەووف ئالانی)لەوتەیەکی کورتدا ئاماژەی بە ناوی کتێبەکەدا و وتی: نامەوێ ناوەڕۆکی کتێبەکە بخەمەڕوو، چونکە لە گرنگی و بایەخی کتێبەکە دێنێتەخوار و بەشداربووان لە خوێندنەوەی کتێبەکە دووردەخاتەوە، بۆیە تەنھا باسێکی کورتی لەسەر پەروەردە کرد و ناوی کتێبەکەی ڕوونتر کردەوە، بەمجۆرە وتی: پەروەردە یەکێکە لە گرنگترین بنەماکانی پێشکەوتنی تاک و کۆمەڵگە، چونکە ڕۆڵێکی سەرەکی لە دروستکردنی کەسایەتی، پەرەپێدانی تواناکان و بڵاوکردنەوەی زانیاری و بەھێزکردنی بەھا ئاکاری و کۆمەڵایەتییەکاندا دەگێڕێت. بۆ تێگەیشتن لە پەروەردە، پێویستە لە دوو ڕووی سەرەکییەوە سەیری بکەین: دیدی پەروەردە و بنیاتی پەروەردە.
یەکەم: دیدی پەروەردە
بریتییە لەو بیرۆکە، تێڕوانین و باوەڕەی کە ئامانج و ئاراستەی پەروەردە دیاری دەکەن. بە واتایەکی تر، دیدی پەروەردە وەڵامی ئەم پرسیارانە دەداتەوە:
چۆن دەتوانین کەسایەتییەکی تەندروست و بەرھەمدار پەروەردە بکەین؟
پەروەردە چۆن دەتوانێت خزمەتی تاک و کۆمەڵگە بکات؟
گرنگترین جۆرەکانی دیدی پەروەردە:
١. دیدی کۆن و نەریتی
٢. دیدی نوێی پەروەردە
٣. دیدی مرۆڤایەتی
٤. دیدی کۆمەڵایەتی
٥. دیدی زانستی و تەکنەلۆژی
دووەم: بنیاتی پەروەردە
بریتییە لە کۆی ئەو بنەما، پێکھاتە و ھۆکارانەی کە سیستمی پەروەردەیان لەسەر دامەزراوە و بەھۆی ئەوانەوە کار دەکات.
بنیاتی پەروەردە تەنھا پەیوەندی بە قوتابخانە و وانەوتنەوەوە نییە، بەڵکو خێزان، کۆمەڵگە، کەلتوور، ئابووری، سیاسەت و دەزگا پەروەردەییەکانیش دەگرێتەوە.
لە کۆتاییدا؛ دید و بنیاتی پەروەردە بنەمای گرنگن بۆ تێگەیشتن لە سروشت و ئەرکی پەروەردە. دیدی پەروەردە ئامانج و ئاراستەی گشتی دیاری دەکات، لە کاتێکدا بنیاتی پەروەردە ئەو بنەما و ھۆکارانە دەخاتەڕوو کە سیستمی پەروەردەیان لەسەر دامەزراوە. کاتێک دیدێکی ڕوون لەگەڵ بنەما و پێکھاتەیەکی بەھێزی پەروەردەدا کۆدەبێتەوە، ئەوا دەکرێت پەروەردە ببێتە ھۆی پێشکەوتنی تاک و بەھێزکردنی کۆمەڵگە و دروستکردنی داھاتوویەکی باشتر.
لەکۆتاییدا کتێبەکە کرایە دیاری و بەسەر ئامادەبوواندا دابەشکرا.