وتەبێژی بانکی ناوەندیی عێراق ڕایگەیاند، هەوڵ و جووڵە دیپلۆماسییەکانی سەرۆک وەزیران ڕۆڵێکی کارای هەبووە لە قایلکردنی بانکی فیدراڵیی ئەمریکا بۆ ناردنی کاروانی نوێی دۆلاری کاش بۆ عێراق.
ئاوێنە: سەبارەت بە قەبارەی پارە نێردراوەکان، مەحمود داغر، وتەبێژی بانکی ناوەندی ئاشکرای کرد کە لە ئێستادا بەهای هەر بارێکی دۆلاری کاش دەگاتە نزیکەی نیو ملیار (٥٠٠ ملیۆن) دۆلار، و پێشبینیش دەکرێت لە داهاتوویەکی نزیکدا بارێکی نوێی دۆلار بگاتە بەغدا کە قەبارەکەی دەگاتە نزیکەی یەک ملیار دۆلار.
لە بەشێکی دیکەی لێدوانەکەیدا جەختی لەوە کردەوە، زیادبوونی بارەکانی دۆلار و خستنەڕووی پارەی کاش لە بازاڕدا، ڕاستەوخۆ دەبێتە هۆی کەمکردنەوەی خواست لەسەر دۆلار و بەهێزکردنی سەقامگیریی بازاڕی دراو، ئەمەش لە کۆتاییدا دەبێتە هۆی بەرزبوونەوەی بەهای دیناری عێراقی بەرامبەر بە دۆلار.