ئاژانسێکی عێراقی بڵاویکردەوە، بڕیارە سبەینێ ئەنجومەنی پارێزگای كەركوك کۆبوونەوەیەکی تایبەت بە یەکلاییکردنەوەی پۆستی پارێزگار رێكبخات، بۆ دیاریکردنی پۆستی نوێی پارێزگاری کەرکوک.
ئاوێنە: ئاژانسی "شەفەق نیوز" لەزاری سەرچاوەیەکی سیاسی لە پارێزگای کەرکوک رایگەیاند "کۆبوونەوەکە لەکاتژمێر چواری پاشنیوەڕۆ بەڕێوەدەچێت، کارنامەی کۆبوونەوەکە بریتییە لە تاوتوێکردنی دەستلەکارکێشانەوەی محەمەد سەمعان ئاغا وەزیری دەوڵەت و پارێزگاری کەرکوک هەڵبژاردنی پارێزگاری نوێ".
دەربارەی کاندیدە نوێکەش کە کێیە؟ سەرچاوەکە راشیگەیاندووە "پێشبینییەکان بۆ ئەوەدەچن كە ئەنجومەنەکە قەحتان ئەلوەنداوی بۆ وەرگرتنی پۆستی پارێزگار هەڵبژێرێت، دوای ئەوەی ناوەکەی لەگەڵ کاندیدێکی دیکەی تورکمان بە ناوی ماردین کوک قایا پێشکەش کراوە".
وتیشی "کۆبوونەوەکەی بەیانی یەکلاکەرەوە دەبێت لە دۆسیەی پۆستی پارێزگاردا، قبوڵکردنی دەستلەکارکێشانەوەی سەمعان ئاغا لە حاڵەتی دەنگدان لەسەری رێگە خۆش دەکات بۆ هەڵبژاردنی پارێزگاری نوێ".