بەڕێوەبەری گشتیی کارەبای سلێمانی رایگەیاند، هەموو تیمەکان لەسەر خەتن بۆ چارەسەر کردنی کێشەی کارەبا و دەڵێت "بەهیواین لەچەند رۆژی ئایندەدا کارەبا چارەسەربکرێت".
ئاوێنە: ئەنوەر حەمە سەعید، بەڕێوەبەری گشتیی کارەبای سلێمانی لە لێدوانێکی تایبەتدا بە ئاوێنەی وت "ئەگەر هەیە بەم نزیکانە کارەبای نیشتیمانی ئاسایی ببێتەوە و هەموو تیمەکان لەسەر خەتن تاوەکو بە زووترین کات ئەو کێشەیە چارەسەر بکرێت".
لەبارەی کارەبای موەلیدە ئەهلیەکانیش، ناوبراو دەڵێت "لە ئێستادا موەلیدەکان کەوتوونەتەوە کار بەکاتی تاوەکو دۆخی کارەبا ئاسایی دەبێتەوە، ئومێدەوارم لەچەند رۆژی ئایندە کارەبا چارەسەر بکرێت".
بەڵام بەڕێوەبەری گشتی کارەبای سلێمانی نەیتوانی بە "دەقیقی" پێمان بڵێت کە کەی دۆخی کارەبا باش دەبێت و وەکو جاران ئاسایی دەبێتەوە، چونکە "لەماوەی ئەم ساڵدا ئەو حاڵەتانە چەند جارێک روویداوە لە کۆرمۆر، لە پێشتر وا راگەیەندرا کە تاوەکو مانگێک چارەسەر نابێت، بەڵام دواتر دوو رۆژ چارەسەر بووە، چونکە بابەتەکە بەشێکی ئەمنی و سیاسی و تەکنیکیە. بەڵام ئەمەل هەیە لە زووترین کاتدا چارەسەر بکرێت".