دکتۆر ئەحمەد موەفەق زێدان، ڕاوێژکاری سەرۆکایەتیی کۆماری سووریا، ئاشکرای کرد کە ویلایەتە یەکگرتووەکانی ئەمریکا پێشنیاری بە دیمەشق کردووە بەدوای پێشهاتە خێرا ئەمنییەکانی لوبناندا دەستتێوەردان بکات، بەڵام سووریا ئەو پێشنیارەی ڕەتکردووەتەوە و جەختی لەوە کردووەتەوە کە هیچ ڕۆڵێکی نابێت لە دەستتێوەردانی سەربازی یان ئەمنی لە کاروباری لوبناندا.
ئاوێنە: زێدان لە چاوپێکەوتنێکدا لەگەڵ کەناڵی "العربیة" ڕایگەیاند کە وڵاتەکەی پاڵپشتی لە فراوانکردنی سەروەریی حکومەتی لوبنان دەکات بەسەر تەواوی خاکی ئەو وڵاتەدا، و جەختیشی کردەوە کە پاڵپشتیکردنی حکومەتی لوبنان لە ڕێگەی دەستتێوەردانی سەربازییەوە نابێت، بەڵکو لە ڕێگەی بەهێزکردنی دامەزراوە حکومییەکان و زیادکردنی دەسەڵاتی یاساییەوە بەدی دێت.
زێدان وتیشی، دیمەشق، سەقامگیریی لوبنان بە بەرژەوەندییەکی گرنگی ناوچەیی دەزانێت، بەڵام هێشتا پابەندە بە پرەنسیپی ڕێزگرتن لە سەروەریی وڵاتان و دەستتێوەردان نەکردن لە کاروباری ناوخۆییاندا.
ڕەخنەی توند لە حزبوڵڵا
ڕاوێژکاری سەرۆکایەتیی کۆماری سووریا لە هەڵوێستێکی جێگەی سەرنجدا، ڕەخنەی ڕاستەوخۆی ئاراستەی حزبوڵڵا کرد و داوای لەو گرووپە کرد کۆتایی بە دەستتێوەردانەکانیان بهێنن لە کاروباری سووریادا.
ناوبراو وتی حزبوڵڵا کێشە بۆ حکومەتی سووریا دروست دەکات و هەندێک لە هەنگاوەکانی ئەو گرووپە نەک هەر یارمەتیدەر نین بۆ سەقامگیریی سووریا، بەڵکو لە خزمەتی بەرژەوەندییە نەتەوەییەکانی ئەو وڵاتەشدا نین.
هەروەها زێدان حزبوڵڵای تۆمەتبار کرد بە پاڵپشتیکردنی ئەو هێزانەی سەر بە ڕژێمی پێشووی سووریان؛ وەک ئاماژەیەک بۆ ئەو کەسایەتی و گرووپانەی کە دوای پێشهاتە سیاسییەکانی ئەم دواییەی ئەو وڵاتە هێشتا لە ناوخۆی سووریادا چالاکن.
پاڵپشتیکردنی حکومەت، نەک دەستتێوەردانی سەربازی
ڕاوێژکاری سەرۆکایەتیی کۆماری سووریا ڕوونی کردەوە کە پاڵپشتیکردنی حکومەتی لوبنان لە ڕێگەی دەستتێوەردانی سەربازییەوە ئەنجام نادرێت، بەڵکو لە ڕێگەی بەهێزکردنی دامەزراوە حکومییەکان و پێدانی توانای پێویست پێیان بۆ جێبەجێکردنی ئەرکە یاسایی و ئەمنییەکانیان بەدی دێت.
بە وتەی زێدان، سووریا سەقامگیریی لوبنان بە بەشێک لە سەقامگیریی ناوچەکە دەزانێت، بەڵام دژی گەڕانەوەیە بۆ هەر ڕۆڵ و ڕێکخستنێک کە لە سەرووی سەروەریی حکومەتی لوبنان و مافی دامەزراوەکانی ئەو وڵاتە بۆ بەڕێوەبردنی کاروبارەکانی خۆی بێت.
ئەم لێدوانانە لە دۆخێکدا دەدرێن کە لوبنان دوای هێرشەکەی ئیسرائیل بۆ سەر گەڕەکی باشووری بەیرووت (زاحییە) و هەڕەشە یەک لەدوای یەکەکانی ئێران بۆ وەڵامدانەوە، ڕووبەڕووی گرژییەکی پەرەسەندوو بووەتەوە.