نووسینگەی سەرۆک وەزیرانی عێراق ئاشکرای کرد، بەپێی رێککەوتنێکی نوێ لەگەڵ حکومەتی ویلایەتە یەکگرتووەکانی ئەمریکا، بڕیار درا فڕۆکەخانەی نێودەوڵەتیی نەجەف لە سزاکانی سەر هێڵی ئاسمانیی ئێران بێبەری بکرێت و لێخۆشبوونی بۆ دەربکرێت.
ئاوێنە: لە راگەیەندراوێکی فەرمیی نووسینگەی راگەیاندنی سەرۆک وەزیرانی عێراقدا هاتووە، ئەم هەنگاوە لە چوارچێوەی هەوڵە بەردەوامەکانی حکومەتە بەمەبەستی دروستکردنی ئاسانکاری بۆ هاتووچۆی زیارەتکاران و گەشتیاران بۆ ناوەوە و دەرەوەی عێراق. هاوکات ئامانجێکی دیکەی رێککەوتنەکە، وەک لە راگەیەندراوەکەدا باسی لێوە کراوە، پاڵپشتیکردنی سێکتەرەکانی مرۆیی، تەندروستی، خوێندن و گەشتیارییە.
سەبارەت بە وردەکارییەکانی رێککەوتنەکەش روون کراوەتەوە، لەمەودوا رێگە بە سەرجەم کۆمپانیاکانی فڕۆکەوانیی ئێران دەدرێت رۆژانە ٤٠ گەشتی ئاسمانی بۆ فڕۆکەخانەی نێودەوڵەتیی نەجەف ئەنجام بدەن، بەڵام ئەم بڕیارە کۆمپانیای فڕۆکەوانیی (ماهان)ی ئێرانی ناگرێتەوە و ئەو کۆمپانیایە وەک پێشتر لەژێر سزاکاندا دەمێنێتەوە.
لە کۆتایی راگەیەندراوەکەدا، نووسینگەی رۆژنامەوانیی سەرۆک وەزیرانی عێراق سوپاس و پێزانینی حکومەتی وڵاتەکەی ئاراستەی حکومەتی ئەمریکا کردووە، لەپای بەدەمەوەچوونی ئەرێنییان و رەزامەندیدانیان لەسەر ئەو داواکارییەی بەغدا.