ئەندامێکی مەکتەبی سیاسیی یەکێتی رایگەیاند، گفتوگۆکانی نێوان مەسرور بارزانی و قوباد تاڵەبانی بەستەڵەکی پەیوەندییەکانی نێوان پارتی و یەکێتیی تواندووەتەوە و بەم نزیکانە کۆبوونەوەی فەرمی ئەنجام دەدرێت.
ئاوێنە: ئەمڕۆ شەممە سەعدی ئەحمەد پیرە، ئەندامی مەکتەبی سیاسیی یەکێتیی نیشتمانیی کوردستان، لە لێدوانێکی رۆژنامەوانیدا وتی "بەستەڵەکی نێوان هەردوو هێزی سەرەکیی حوکمڕانی لە هەرێمی کوردستان بەرەو توانەوە دەچێت، چونکە دیالۆگ و لێکتێگەیشتنەکانی نێوان مەسرور بارزانی، سەرۆکوەزیرانی هەرێمی کوردستان، و قوباد تاڵەبانی، جێگری سەرۆکوەزیران، هەنگاوێکی ئەرێنی و کاریگەر بووە بۆ شکاندنی ئەو ساردییەی کەلە قۆناخی رابردوودا دروست ببوو".
پیرە پێشبینیکرد لە رۆژانی داهاتوودا ئەم کەشە ئەرێنییە لەرێگەی کۆبوونەوەیەکی فەرمیی نێوان پارتی و یەکێتی بەرجەستە ببێت، بەمەبەستی یەکلاکردنەوەی پرسە هەڵپەسێردراوەکان و برەودان بە کاروانی حوکمڕانی و چەسپاندنی سەقامگیریی سیاسی لە هەرێمی کوردستاندا.
لەبارەی هێزە ئەمنییەکانی هەرێمیشەوە، ئەندامەکەی مەکتەبی سیاسیی یەکێتی باسی لەوەکرد، "هیچ گومانێک لە توانست و لێهاتوویی هێزەکانی پێشمەرگەی کوردستان بۆ پاراستنی خاک و خەڵکی هەرێمی کوردستان لە ئارادا نییە".
"هاوپەیمانە نێودەوڵەتییەکان بەردەوام دەبن لە پاڵپشتیکردنی هێزی پێشمەرگە و دەستبەرداری پاراستنی هەرێمی کوردستان نابن، چونکە پاشماوە و مەترسییەکانی رێکخراوی تیرۆریستیی داعش پێش ئەوەی هەڕەشە بن بۆسەر ناوچەکە، هەڕەشەیەکی ڕاستەوخۆن بۆسەر ئاسایشی وڵاتانی رۆژئاوا و خودی هاوپەیمانان"، سەعدی ئەحمەد پیرە وا دەڵێ