سەرچاوە عێراقییەکان ڕایانگەیاندووە کە ئەفسەرانی «سوپای پاسداران»ی ئێران، سەرپەرشتی ئۆپەراسیۆنەکانی گرووپە چەکدارەکان لە عێراق دەکەن و هەوڵەکانی سیاسییە شیعەکانیان بۆ ڕازیکردنیان بە ڕاگرتنی هێرشەکان لە ناوخۆی وڵاتدا ڕەتکردووەتەوە. ئەم ئەفسەرانە لە دوای هەڵگیرسانی جەنگی ئەمریکا و ئێرانەوە، وەک «سەرپەرشتیاری سەربازیی سێبەر» لە بەغدا کار دەکەن، بە ئامانجی بەردەوامیدان بە «بەرەیەکی گوشار» لەسەر واشنتۆن و خۆسازدان بۆ سیناریۆی شکستی دانوستانەکان لەگەڵیدا.
ئاوێنە: ڕۆژنامەی «شەرقولئەوسەت» لە ٢٤ی ئازاری ٢٠٢٦دا ئاشکرای کردبوو کە لێشاوێک لە ئەفسەرانی «هێزی قودس» ڕوویان لە عێراق کردووە بۆ بەڕێوەبردنی ئۆپەراسیۆنەکانی پەکخستن (استنزاف) و دامەزراندنی ژوورێکی ئۆپەراسیۆنی جێگرەوە بۆ «سوپای پاسداران».
بەگوێرەی سەرچاوەکان، ئەفسەرانی «هێزی قودس» بەردەوام لە نێوان شارە عێراقییەکاندا هاتوچۆیان دەکرد بۆ سەرپەرشتیکردنی جێبەجێکردنی ئۆپەراسیۆنە هێرشبەرییەکان، و یارمەتیدانی گرووپە چەکدارەکان بۆ پەرەپێدانی تەقەمەنی ناوخۆیی بۆ درۆنەکان، و پێدانی تەکنیکی هونەریی پەیوەندیدار بە مووشەکەکان بە ئامانجگەلێک کە بەردەوام نوێ دەکرانەوە.
لیستە ڕۆژانەکان
سەرچاوەیەک ڕایگەیاندووە: «ئەفسەرانی سوپای پاسداران لیستی ڕۆژانەیان دەدایە گروپە چەکدارە عێراقییەکان کە پێکدەهات لەو ئامانجانەی دەبێت لێ بدرێن، جۆری تەقەمەنییەکە و کاتی بەئامانجگرتنەکە».
یەکێکی تر لەو ئەرکانەی ئەم ئەفسەرانە سەرپەرشتییان دەکرد، «دابەشکردنی شانە پسپۆڕەکان بوو بۆ دانانی سەکۆی هاویشتنی درۆن و یەکەکانی چاودێری سەربازی لە ناو (ماڵە ئارامەکاندا) کە لە شوێنی نوێ لە ناوخۆی وڵاتدا هەڵبژێردرابوون، ئەمەش بۆ خۆلادان لەو نیشانانەی کە فڕۆکە ئەمریکییەکان پێش جەنگ و لە کاتی جەنگدا دەستنیشانیان کردبوون».
سەرچاوەیەک ئاماژەی بەوە کردووە کە «لەگەڵ گەیشتن بە هەفتەی چوارەمی جەنگەکە، گۆڕانکاری بەسەر پێکهاتەی ئەوەی بە (بەرگری - المقاومة) لە عێراق دەناسرێت هات؛ بە شێوەیەک گرووپە سەرەکییەکان لە عێراقدا گوازرانەوە بۆ چوارچێوەیەکی کارکردنی نوێ کە لەسەر بنەمای تۆڕی نیمچە سەربەخۆ کار دەکەن و هەڵوەشاندنەوەیان قورسە».
ئەم جموجۆڵانە لە چوارچێوەی شێوازێکی کارکردن دایە کە بە وتەی کەسێکی نزیک لە گرووپەکان، لەسەر بنەمای دابەشکردنی ڕۆڵەکان لە نێوان شانە مەیدانییە تایبەتمەندەکاندا دەبێت کە بە شێوەیەکی نەرم لە ناو ژینگەی ئەمنیی ئاڵۆزدا کار دەکەن.
سەرچاوە عێراقییەکان دەڵێن «سوپای پاسداران» لە عێراق تۆڕی گرووپە چەکدارەکانی بە جۆرێک ئەندازیاری کردووە کە توانای نکوڵیکردن (قابلية الإنكار) لە ڕێگەی چەندین چینی جیاوازەوە مسۆگەر بکات، کە «پەرچەکردار و تەمومژ» دابین دەکەن.
هەروەها سەرچاوەکان ئاماژەیان بەوە کردووە کە هەندێک لە شانەکان ڕاسپێردرابوون بۆ ئەنجامدانی هێرشی تێپەڕێنەری سنوورەکان کە بەرژەوەندییەکانی وڵاتانی دراوسێی عەرەبییان کردووەتە ئامانج، ئەمەش لە چوارچێوەی فراوانبوونی بازنەی پێکدادانی ناڕاستەوخۆ و تێکەڵبوونی گۆڕەپانە هەرێمییەکان.
پێشتر بۆردومانێکی نادیار ماڵێکی لە شارۆچکەی «خۆرهولزبێر» لە بەسرە کردبووە ئامانج (کە نزیکەی ١٥٠ کیلۆمەتر لە کوەیتەوە دوورە)، تێیدا ڕادارێک و سەکۆیەکی هاویشتن تێکشکێنران، و ئەندامانی شانەیەک کە سەرکردەیەکی «کەتائیبی حیزبوڵڵا» و دوو کەسی تری تێدا بوو، کوژران.
ڕۆژی پێنجشەممە، «سوپای پاسداران»ی ئێران ئەنجامدانی هێرشی بۆ سەر وڵاتانی کەنداو ڕەتکردەوە، بەڵام بە وتەی سەرچاوەیەکی نزیک لە گرووپەکان، تاران «توانادارە بەوەی گرووپە عێراقییەکان بۆ جێبەجێکردنی ئەم ئەرکە بەکاربهێنێت».
سەرچاوەکان دەڵێن: «لە هەفتەی کۆتایی جەنگەکەدا، پێش ڕاگەیاندنی ئاگربەستی کاتی، ئەفسەرە ئێرانییەکان فەرمانیان دا بە گەڕانەوەی ئەو یەکانەی سەر بە گرووپە چەکدارەکان بوون کە لە ناوچەکانی نەینەوا و کەرکوک پاشەکشەیان کردبوو. جەختیان کردەوە کە دەبێت گرووپەکان ئەو شوێنانە وەربگرنەوە کە بۆ پێکهاتە سەربازییەکانی تر جێیان هێشتبوو» لە ژێر فشاری هێرشە ئاسمانییەکانی ئەمریکادا.
«وەڵامی پەیوەندییەکان ناداتەوە»
دوو کەس لە «چوارچێوەی هەماهەنگی» و حکومەتی عێراق ڕایانگەیاندووە کە سەرۆکی ٤ پارتی شیعە، لە ماوەی هەفتەکانی ڕابردوودا، گفتوگۆیان لەگەڵ بەرپرسانی ئێرانی لە ناو عێراقدا کردووە، بە ئامانجی قەناعەتپێکردنیان بە پێویستی ڕاگرتنی ئەو هێرشانەی بەرژەوەندییەکانی ئەمریکا دەکەنە ئامانج، بەڵام ئەوان وەڵامیان نەبووە، سەرەڕای دووبارەکردنەوەی هەوڵەکان.
سەرچاوەکان دەڵێن یەکێک لە ئەفسەرانی «هێزی قودس» کە هەژموونێکی زۆری لە بەغدا هەیە، «وەڵامی پەیوەندیی سیاسییە عێراقییەکان ناداتەوە، تەنانەت ئەو هاوپەیمانانەشی کە لە ناو (چوارچێوەی هەماهەنگی) دان، لە کاتێکدا بازنەی پەیوەندییەکانی تەنها لەگەڵ بەرپرسانی ئۆپەراسیۆنەکانی ناو گرووپە چەکدارەکاندا کورت بووەتەوە».
ئەم پەیوەندییانە ئاماژەن بۆ هەوڵە ناوخۆییەکان بۆ کۆنترۆڵکردنی گرژییەکان و ڕێگریکردن لە خلیسانی عێراق بەرەو ڕووبەڕووبوونەوەیەکی فراوانتر، لە کاتێکدا فشارەکان بۆ سەر حکومەتی عێراق بۆ سنووردارکردنی گرووپە چەکدارەکان زیاد دەکات، بەڵام وەک بەرپرسێکی عێراقی دەڵێت: «ئیرادەی سیاسی ناوخۆیی بۆ ئاستێکی بێپێشینە کەمبووەتەوە».
بەرپرسە ئەمنییەکانی ناو حکومەتی عێراق بێزاریی خۆیان لە «زیادبوونی ئەو باڵادەستییەی ئەفسەرانی سوپای پاسداران سەپاندوویانە» نیشان داوە.
سەرچاوەکان لە زاری بەرپرسێکی باڵای عێراقییەوە، کە لە کۆبوونەوەیەکی ئەمنیی تایبەتدا قسەی کردووە، گواستوویانەتەوە: «چۆن دەبێت ئێمە نەتوانین ڕێگری لەم پیاوە (ئەفسەرێکی سوپای پاسداران) بکەین؟... ئەم ئەبو فڵانە کێیە؟». هەروەها وتی: «بۆچی ناتوانین دەستگیری بکەین؟ یان لانیکەم ڕێگری لێ بکەین لە ئەنجامدانی ئەم هێرشانە؟».
بەڵام سەرکردەکانی «چوارچێوەی هەماهەنگی» پێیان وایە کە «کێشەکە، بە ئەگەرێکی زۆرەوە، تەنها پەیوەندی بە خراپیی پەیوەندییەکانەوە هەیە و هیچی تر؛ چونکە ئێرانییەکان ڕێکاری ئەمنیی توند دەگرنە بەر سەبارەت بە پەیوەندییەکان».
«سەرپەرشتیاری سەربازی»
لەگەڵ ئەوەشدا، کەسانێک لە ناو «چوارچێوەی هەماهەنگی» ئەو واقیعە نوێیەی گرووپە چەکدارەکان دەیسەپێنن بەوە وەسف دەکەن کە «ئەو ئەفسەرە مەیدانییانەی سەر بە (سوپای پاسداران)ن، بە کردەیی دەبنە سەرپەرشتیارێکی سەربازی کە لە عێراقدا بەرەیەکی ململانێ لەگەڵ ویلایەتە یەکگرتووەکان بەڕێوە دەبەن، بەبێ ڕەچاوکردنی تایبەتمەندیی عێراق». ئاماژەیان بەوەش کردووە کە «کەلەپەکیی ئێرانییەکان لەبەردەم داواکارییەکانی ڕاگرتنی هێرشەکان، بەو مانایەیە کە تاران هیوایەکی بە دانوستانەکان لەگەڵ واشنتۆن نییە و بەرەکە ئامادەیە بۆ گڕگرتن».
بە وتەی بەرپرسانی عێراقی، ئەم هەڵوێستە ڕەنگدانەوەی قەبارەی ئەو تەحەدایەیە کە دامەزراوە ئەمنییەکان لە کۆنترۆڵکردنی ئەو فەزایانەی لەژێر دەسەڵاتی ڕاستەوخۆی دەوڵەتدا نین، ڕووبەڕووی دەبنەوە.
وەزارەتی دەرەوەی ئەمریکا دەڵێت میلیشیا عێراقییەکان پۆشەری حکومی، دارایی، کارگێڕی و سیاسییان هەیە؛ هەر بۆیە دەسەڵاتداران لە ڕێگریکردن و سنووردارکردنی هێرشەکانیاندا شکست دەهێنن، ئەمەش بەگوێرەی بەیاننامەیەک کە ڕۆژی پێنجشەممە بڵاوکرایەوە.
سیاسییەکانی «چوارچێوەی هەماهەنگی» پێشبینی ئەوە دەکەن کە «ڕەفتاری ئەفسەرانی سوپای پاسداران، گوزارشت لە ئارەزووی ئێران دەکات بۆ هێشتنەوەی عێراق وەک بەرەیەکی گوشار لەسەر ئەمریکییەکان هاوکات لەگەڵ دەستپێکردنی ڕێڕەوی دانوستان بە نێوەندگیری پاکستان»، بەڵام بە وتەی بەرپرسێکی باڵا «ئەوان سەرکێشی بەوەوە دەکەن کە سیستەمی سیاسی لە بەغدا بەرەو پاشاگەردانی بخلیسێنن و بە خێرایی بەرەو گۆشەگیرییەکی هەرێمی هەنگاو بنێت».