سەرۆکوەزیرانی عێراق بە بۆنەی جەژنی نیشتمانی کۆماری عێراق لە ٣ی تشرینی یەکەمی ٢٠٢٦ چەند پەیامێکی خستە روو و ئاماژە بەوەدەکات کەلە قورسترین دۆخدا بەرپرسیاریەکەی هەڵگرتووە و دەشڵێت "بەردەوام دەبین لە رووبەڕوبوونەوەی گەندەڵی".

ئاوێنە: عەلی زەیدی، سەرۆکوەزیرانی عێراق وتاریدا و وتی "بەرەو بودجەی بەرنامە و ئەنجام هەنگاو دەنێین بۆ ئەوەی خەرجی حکومی بە ئەنجامەکانەوە بەستراوە بێت".

وتیشی "بەردەوام دەبین لە روبەڕوبوونەوەی گەندەڵی، پاراستنی سەروەت و سامانی گشتی و بەهێزکردنی چاودێری خۆپارێزی".

بەوتەی زەیدی، لە کاتێکی زۆر ئاڵۆزدا "بەرپرسیارێتی" عێراقی هەڵگرتووە و رووبەڕووی ئاستەنگە بەدوای یەکەکان بوونەتەوە كە "پێویستی كرد لەسەرمان بەرژەوەندییەکانی عێراق و ئاسایش و سەروەری و بڕیاری نیشتمانی هەبوو لەلێکەوتەکانی ململانێكانی ناوچەکە بپارێزین".

ئەوەش بەشێکی دیکە لە قسەکانی سەرۆکوەزیرانە:

ـ پیرۆزبایی لە گەلی عێراق دەکەم بە بۆنەی جەژنی نیشتمانییەوە، لە 3ی تشرینی یەکەمدا یادی سەربەخۆیی وڵاتەکەمان دەکەینەوە کە زیاتر لە 90 ساڵە وەک دەوڵەتێکی سەربەخۆ دانی پێدا دەنرێت.
ـ عێراق یەکەم دەوڵەتی عەرەبی بوو پەیوەندی بە کۆمەڵەی گەلانەوە کرد و بەشداری کرد لە دامەزراندنی رێکخراوی نەتەوە یەکگرتووەکاندا.
ـ چیرۆكی عێراق کۆنترە لەم مێژووە، لەدایکبوونی شارستانییەتی مرۆڤایەتی دۆكۆمێنت كردووە؛ لەسەر ئەم خاكە نوسین و یاساکان لەدایک بوون.
ـ عێراق لە پاش سەربەخۆییەوە بە قۆناغی ئاڵۆزدا تێپەڕی کە بووە هۆی لەدەستدانی دەرفەتی گەشەپێدان، بەهۆی ناسەقامگیری سیاسی و گەڕانەوەی دووبارە بۆ خاڵی سفر.
ـ دوای ساڵی 2003، هاوڵاتییانی عێراق ئەزموونی دەوڵەتی دیموکراتیان تاقی کردەوە و قوربانی گەورەیان دا بۆ پاراستنی و دەستورێکی هەمیشەییان پەسەند کرد کە دەستاودەستکردنی ئاشتیانەی دەسەڵات بچەسپێنێت.
ـ لە 30ی ئەیلولی 2026، دەوڵەتی عێراق سەروەری خۆی تەواو کرد، بە کۆتاییهاتنی ئەركی سەربازی هاوپەیمانی نێودەوڵەتی.
ـ ئێمە ئەمڕۆ دەوڵەتێکین کە خاوەنی بڕیاری خۆیەتی، خاک و ئاسمانی خۆی دەپارێزێت و چەک لەژێر دەسەڵاتی فەرماندەی گشتی هێزە چەکدارەکاندا دەبێت.
ـ سەرەڕای ئاستەنگە سەختەکان، عێراق بەردەوامە لە سیاسەتێکی دەرەکی هاوسەنگ کە بەرژەوەندی نیشتمانی باڵا رەچاو دەکات و پەیوەندییەکانی لەسەر بنەمای بەرژەوەندی و ڕێزگرتنی هاوبەش بونیاد دەنێت.
ـ ئاستەنگە ئابورییەکان و بارودۆخی ناوچەیی و نێودەوڵەتی ئاڵۆزتر دەبن و ئێمە کار بۆ روبەڕوبوونەوەیان دەکەین لە ڕێگەی ئابورییەکی هەمەچەشنتر، پەرەپێدانی هاوبەشی کاریگەر لەگەڵ وڵاتانی جیهان، بوژاندنەوەی کەرتی تایبەت و ڕەخساندنی هەلی کار.
ـ بەردەوام دەبین لە جێبەجێکردنی پێشنیازی ملیۆنێک پارچە زەویی نیشتەجێبوون، دامەزراندنی سندوقی نەوەکان وەک دڵنیاییەک بۆ داهاتووی منداڵەکانمان، دروستکردنی شارە ئابوورییەکان و جێبەجێکردنی پڕۆژەی ڕێگەی گەشەپێدان تاوەکو عێراق ببێتە ڕێگەی بازرگانی، تێپەڕگەی ووزە، ناوەندێکی وەبەرهێنان و پردێک لە نێوان رۆژهەڵات و رۆژئاوادا.
ـ عێراق بە رۆڵەكانی و هاوسەنگی نیشتمانی و کۆمەڵایەتی خۆی، لە قۆناغی قەیرانەکانەوە دەگوازرێتەوە بۆ قۆناغی بونیادنانی داهاتوو،و گەورەترین پێویستیی ئەمڕۆمان پاراستنی یەکڕیزیمانە لە نیشتمانێکدا کە جێگەی هەمووان بێت.
ـ بەڵێن بە عێراقییەکان دەدەین کە بەرژەوەندی عێراق لە سەرووی هەموو شتێکەوە بمێنێت، هاووڵاتی چەقی بایەخدان بێت و دەوڵەتی بەهێز و دادپەروەر ئامانجمان بێت.