وتەبێژی وەزارەتی پلاندانانی عێراق ڕایگەیاند، وەك ئامادەكاری بۆ سەرژمێری گشتی دانیشتوانی عێراق بەچەند قۆناغێكی ڕاهێنان بە ١٢٠ هەزار كارمەند دەكەین، لە قۆناغی یەكەمدا ٤٠ هەزار كارمەند ڕاهێنان دەكات.
ئاوێنە: عەبدول زەهرا هنداوی، وتەبێژی وەزارەتی پلاندانانی عێراق لە بارەی ئامادەكاریەكانیان بۆ ئەنجامدانی سەرژمێری گشتی دانیشتوانی عێراق و هەرێمی كوردستان، بۆ میدیا ناوخۆییەكان دەدوێت.
عەبدول زەهرا هنداوی ڕایگەیاند، لە ماوەی هەفتەی داهاتووەوە ڕاهێنان بۆ كارمەندەكانیان دەست پێدەكات، كە ژمارەیان ١٢٠كارمەند دەبێت، ڕاهێنانەكە بەچەند قۆناغێكی ئەنجام دەدرێت.
دەشڵێت: قۆناغی یەكەم ٤٠ هەزار كارمەند ڕاهێنان دەكەن، ئەوانی تریش لە قۆناغی دیكەدا ڕاهێنان دەكەن تا دەگاتە ١٢٠ هەزار كەس و هەوویان ڕاهێنانیان پێدەكرێت، بۆ ئەوەی ئامادەبن بۆ ئەنجامدانی سەرژمێری دانیشتوان، ئەمانە بە شێوەیەكی سەرەكی بەسەر پارێزگاكاندا دابەش دەكرێن .
ئاماژەی بەوەشكرد، ئەو كارمەندانە لەلایەن ژمێریارەكان و مامۆستای تایبەتەوە ڕاهێنانەكانیان پێ دەوترێتەوە، فێری ئامار و سیستەم و زانیارییەكانی وەزارەتی پلاندانانیان دەكەن.
جێگەی ئاماژەیە، سەرژمێری ئەزموونی دانیشتوانی عێراق و هەرێمی كوردستان لە ٣١ی ئایاری ئەمساڵ دەستیپێكرد و ڕۆژی ١٣ ئەم مانگە كۆتایی هات، هەروەها بڕیارە لە ٢٠ی تشرینی دووەمی ئەمساڵ سەرژمێری فەرمی ئەنجام بدرێت.