دەستەی کەشناسیی عێراق ئەمڕۆ سێشەممە وردەکاریی کەشوهەوای ڕۆژانی داهاتووی وڵاتی ڕایگەیاند و پێشبینیی بارینی نمەباران و دابەزینی پلەکانی گەرما دەکرێت.
ئاوێنە: بەپێی ڕاگەیەندراوێکی دەستەکە، سبەی چوارشەممە لە ناوچەکانی باکوور و باشوور ئاسمان هەور بۆ نیمچەهەور دەبێت و لە ڕۆژدا ئەگەری تاوەبارانی پچڕپچڕ لە ناوچەی باکوور هەیە.
پلەکانی گەرما نزم دەبنەوە
دەستەکە بەرزترین پلەکانی گەرمای سبەی چوارشەممەی لە پارێزگاکان بەم شێوەیە دیاریکردووە: دهۆک و سلێمانی 18، هەولێر و نەینەوا 19، کەرکووک 21، سەڵاحەدین و ئەنبار 25، بەغدا و دیالە 26، بابل، کەربەلا، نەجەف و میسان 27، واست و دیوانییە 28، موسەننا، زیقار و بەسرە 29 پلەی سیلیزی.
تاوەباران دەبارێت
بۆ ڕۆژی پێنجشەممە، ئاسمان لە باکوور و ناوەڕاست نیمچەهەور بۆ هەور دەبێت لەگەڵ ئەگەری تاوەبارانی سووک لە ناوچەی باکوور بەتایبەت لە ناوچە شاخاوییەکان، لە باشووریش ساماڵ و کەمێک هەوراوی دەبێت؛ پلەکانی گەرما لە باکوور و باشوور کەمێک بەرزدەبنەوە و لە ناوەڕاست وەک خۆیان دەمێننەوە.
هەروەها ئاراس جەبار، شارەزای کەشناسی بڵاویکردووەتەوە کە لە ئەنجامی کاریگەری نزمەپاڵەپەستۆیەکی لاواز سبەی چوارشەممە 18/11/2026 ئاسمانی هەرێم بە زۆری دەگۆرێت بۆ نیمچە هەور و هەوری تەواو لە نێوان کاتەکانی بەیانی بۆ ئێوارە ئەگەری بارینی بارانێکی مامناوەند و پچڕ پچرڕ ئەبێت بەسەر ناوچەکانی سنوری پارێزگای دهۆک و ئیدارەی زاخۆ و سۆران ، لەسەنتەری پارێزگای هەولێر و ئیدارەی راپەرین و ناوچە شاخاویەکانی پارێزگای سلێمانی کاتەکانی دوای نیوەرۆ ئەگەری نمە باران ئەبێت ، پلەکانی گەرما بەڕاورد بە ئەمرۆ 2 تا 3 پلە نزمدەبنەوە