دژەتیرۆری کوردستان بڵاویكرده‌وه، دو درۆنی بۆمبڕێژکراو ئاڕاستەی نوسینگەی تایبەتی مه‌سرور بارزانی، سەرۆک وەزیران و شوێنی حەوانەی بەڕێوەبەری ئاژانسی پاراستن کران.
ئاوێنە: دژەتیرۆری کوردستان له راگه‌یه‌ندراوێكدا باسی له‌وه‌كردوه، "بەرەبەیانی ئەمڕۆ دوشەممە دو درۆنی بۆمبڕێژکراو لە جۆری (حەدید-110) لە دیوی سنوری وڵاتی ئێرانەوە ئاراستەی بارەگای نوسینگەی تایبەتی سەرۆک وەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستن لە قەزای پیرمامی پارێزگای هەولێر کران، خۆشبەختانە هیچ زیانێکی گیانییان لێ نەکەوتەوە".
دژەتیرۆری کوردستان ئاماژه‌ی به‌وه‌كردوه، "ئەم هێرش و دەستدرێژییانە بە توندترین شێوە سەرکۆنە دەکەین و بەهیچ شێوەیەک مایەی قبووڵکردن نین، تەواوی بەرپرسیارێتیی لێکەوتەکانیشی لە ئەستۆی ئەنجامدەرانیدایە".
سه‌ره‌ڕای ئه‌وه‌ی له‌ماوه‌ی رابردودا نزیكه‌ی هه‌زار جار هێرشكراوه‌ته سه‌ر هه‌رێمی كوردستان به‌ڵام هێرشكردنه سه‌ر نوسینگه‌ی تایبه‌تی سه‌رۆك وه‌زیرانی هه‌رێمی كوردستان بێپێشینه‌یه.
هه‌فته‌ی رابردو مەسرور بارزانی له‌میانی چاوپێكه‌وتنێكدا له‌گه‌ڵ كه‌ناڵی ئەلجەزیرەی قه‌ته‌ری، رایگه‌یاند، "پاڵپشتی هەرێمی كوردستان بۆ هەوڵەکانی حکومەتی عێراق بۆ كۆكردنه‌وه‌ی چەک لە ژێر دەسەڵاتی هێزە چەکدارەکان دوپاتده‌كه‌ینه‌وه، هەرێم نایەوێت ببێتە لایەنێک لە هەر ململانێیەک لە ناوچەکەدا، هیچ لایەنێکیش فشاری نەخستوەتە سەر حکومەتی هەرێم بۆ ئەوەی بەشداری شەڕەکە بکات".