ئیلهام ئەحمەد ئیدانەی هێرشەکانی سەر ئاواره كورده‌كانی سه‌رێكانی کرد و ڕاشیگەیاند، جموجۆڵی دیپلۆماسی نێوان ڕۆژئاوای كوردستان و دیمەشق بەردەوامە و وتیشی: پرسی کورد لە ناوەندی هەمو گفتوگۆکاندایە.
ئاوێنه: ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی ئیدارەی خۆبەڕێوەبەری له چاوپێكه‌وتنێكدا له‌گه‌ڵ كه‌ناڵی روناهی، باسی لە هەوڵە دیپلۆماسییەکانی نێوان ڕۆژئاوای كوردستان و دیمەشق کرد و ڕایگەیاند، عەبدوڵا ئۆجه‌لان ڕۆڵێکی سەرەکی لە جێبەجێکردنی ئاگربەستەکەدا بینیوە.
وتیشی: کۆتاییهێنان بە شەڕی چەکداری خاڵی دەستپێکی گەیشتن بە چارەسەری سیاسییە، پرۆسەی ئاشتی و پرۆژەی کۆمەڵگای دیموکراسی کە لەلایەن ئۆجه‌لانەوە دەستی پێکراوە کاریگەریی ڕاستەوخۆی لەسەر ناوچەکە هەیە.
ئیلهام ئەحمەد وتیشی: لە کاتی هێرشەکانی ئەم دواییەی سەر ناوچەکانمان هەوڵماندا پەیوەندی لەگەڵ عەبدوڵا ئۆجه‌لان دروست بکەین و دیداری لەگەڵ ئەنجام بدەین.
سەبارەت بە پرسی ئاواره‌كان ئیلهام ئەحمەد باسی لەوەشکرد، کاتی ئەوە هاتوە هەمو ئاواره‌كان بگەڕێنەوە سەر ماڵ و حاڵی خۆیان، هێرشکردنە سەریان جێگەی قبوڵکردن نییە، هێرشکردنە سەر دامەزراوەکانی دەوڵەت لە هیچ بارودۆخێکدا ڕەوا نییە.
ئیلهام ئەحمەد ئاماژەی بەوەشکرد، هەندێک لایەن کە دژی پرۆسەی یه‌كگرتنن لە پشت ئەم هێرشانەوەن و وتیشی: لە پەیوەندیی ڕاستەوخۆداین لەگەڵ دیمەشق سەبارەت بە ڕوداوەکانی ئەم دواییە.
لە بەردەوامیدا سەرنجی بۆ پرسی تێكه‌ڵبونی کورد لەناو دامەزراوەکانی دەوڵەتدا ڕاکێشا و وتی: بابەتی تێكه‌ڵبونی کورد بە دامەزراوەکانی دەوڵەت بە ئەنقەست ڕەش دەکرێت.
وتیشی: نابێت کورد بە هیچ بیانویەکی ناسیۆنالیستی بخرێتە مەترسییەوە، دۆزی کورد پرسێکی ناوەندی و سەرەکییە لە گفتوگۆکان لەگەڵ دیمەشقدا.
سەبارەت بە پارێزگای حەسەکە، ئیلهام ئەحمەد ئاماژەی بەوە کرد، ڕێنماییە ئیدارییەکانی پارێزگاکە هێشتا کۆتاییان پێنەهاتوە و پرسی زمانی کوردی گەیشتوەتە ئەو ئاستەی کە دەبێت دیمەشق دان بە زمانی کوردیدا بنێت و قبوڵی بکات. هەروەها ڕونیشی کردەوە کە پرۆسەی تێکەڵبون ناتوانێت بەبێ چاره‌سه‌ركردنی كێشه‌ی زمانی كوردی ته‌واو بێت.
لە کۆتاییشدا وتی: دەبێت ئێمە سوریا وەکو وڵات و دەوڵەتی خۆمان ببینین و کار بۆ داهاتوی بکەین.