بەپێی ڕاپۆرتێکی ڕۆژنامەی "ئۆرشەلیم پۆست"، مارکۆ ڕۆبیۆ، وەزیری دەرەوەی ئەمریکا، ئاماژەی بەوە کردووە ئەو گرووپانەی لە ناوخۆی عێراقەوە فڕۆکەی بێفڕۆکەوان (درۆن) و مووشەک بەکاردەهێنن، دەبنە ڕێگر لەبەردەم کۆتاییهاتنی ململانێ و گرژییەکانی ناوچەکە و مەترسی ڕاستەقینە لەسەر سەقامگیری دروست دەکەن. ڕۆبیۆ باسی لەوەش کردووە کە ئەگەر مامەڵەی پێویست لەگەڵ ئەم لایەنانە نەکرێت، لەسەر چالاکییەکانیان بەردەوام دەبن.
ئاوێنە: وەزیری دەرەوەی ئەمریکا ئەوەشی خستووەتەڕوو کە واشنتۆن لە کاتی خۆیدا کار لەسەر ئەم بابەتە دەکات و لەو دانوستانانەی ئێستا لە ئارادان دەوروژێنرێت؛ ئەمەش وەک بەشێک لە هەوڵەکانی ئەمریکا بۆ بەدیهێنانی سەقامگیری گشتی و لەناوبردنی ئەو هۆکارانەی ئاسایشی ناوچەکە تێکدەدەن.
ڕۆژنامەی ئۆرشەلیم پۆست لە شیکارییەکەیدا نووسیویەتی، لێدوانەکانی ڕۆبیۆ ئاماژەیەکی ڕوون و گرنگن بۆ حکومەتی عێراق سەبارەت بە خواستی جددی واشنتۆن بۆ کۆنترۆڵکردنی تحرکاتی ئەو گرووپانە. پێشتریش ئیدارەی ئەمریکا هەڵمەتێکی فراوانی بۆ بەئامانجگرتنی ئەو لایەنانە و سەرکردەکانیان دەستپێکردبوو، کە خۆی لەم ڕێکارانەدا دەبینییەوە:
- سەپاندنی سزای ئابووری بەرفراوان بەسەر کەسایەتی و لایەنەکاندا.
- دانانی ناوی ئەو گرووپانە لە لیستەکانی فەرمی تیرۆردا.
- هاوتەریبی لەگەڵ هەوڵەکانی حکومەتی عێراق
ئەم هەڵوێستە نوێیەی ئەمریکا هاوکاتە لەگەڵ بانگەوازە بەردەوامەکانی ناوخۆی عێراق بۆ سنووردارکردنی چەک و کۆنترۆڵکردنی لەژێر چەتری دەوڵەتدا. ئەم بابەتە بە شێوەیەکی سەرەکی لە سەردانەکەی ئەم دواییەی تۆم باراک، نوێنەری سەرۆکی ئەمریکا بۆ بەغداد باسی لێوەکرا، کاتێک لە دیدارێکیدا لەگەڵ عەلی فالح ئزەیدی، سەرۆکوەزیرانی عێراق، جەختی لەسەر گرنگی چاکسازییە ئەمنییەکان و سەروەری یاسا کردەوە.