دۆناڵد ترەمپ، سەرۆکی ئەمریکا بانگەشەی کردووە کە ئەمریکا هاوکاری ساڵانەی ٤ ملیار دۆلاری بۆ ئیسرائیل دەوەستێنێت، بەڵام بەشێوەیەکی ئاسایی چەک بە تەلئەبیب دەفرۆشێت.

ئاوێنە: ئاژانسی ئاسۆشێیتد پرێس بڵاویکردەوە، ترەمپ لە گفتوگۆیەکی تەلەفۆنیدا لەگەڵ کەناڵی هەواڵی "فۆکس نیوز" رایگەیاندووە، "دەتوانن ئەمە وەک جۆرێک لە ئاڵوگۆڕ لێی بڕوانن؛ چ یارمەتیی سەربازی بێت و چ پارەی نەخت. سەیری بکەن، ئێمە بە بڕی ٤ ملیار دۆلار کاڵا و پارەیان پێدەدەین، لەکاتێکدا ئەوان پێویستییان پێی نییە. نەتانیاهۆ ئەم بابەتەی لەگەڵم باسکردووە و نزیکەی دوو ساڵە لەسەری گفتوگۆ دەکەین، چونکە بڕەکە زۆر گەورەیە".

ترەمپ وتوویەتی "ئیسرائیل پێویستی بەو یارمەتییانە نییە و ئەم بڕە پارەیە بارێکی دارایی قورسە بۆ ئەمریکا. هەروەها ئاماژەی بەوەشکردووە کە یارمەتییەکانی ئەمریکا بۆ ئیسرائیل بووەتە بابەتێکی مشتومڕ لەنێوان هەندێک لە کاندیدەکانی حیزبی دیموکرات، لەوانەش "عەبدول ئەلسەید"، کاندیدی پۆستی ئەنجومەنی پیران لە ویلایەتی میشیگان.

سەرۆکی ئەمریکا دەشڵێت "ئەمریکا لە ساڵانی ڕابردوودا دەیان ملیار دۆلار یارمەتیی سەربازی پێشکەشی ئیسرائیل کردووە".

توێژینەوەیەکی ئەکادیمی کە ساڵی ڕابردوو بڵاوکراوەتەوە، ئاماژە بەوە دەکات کە ئەمریکا لە سەردەمی سەرۆکایەتیی جۆ بایدن و دۆناڵد ترەمپدا، دوای دەستپێکردنی جەنگی غەززە لە ساڵی ٢٠٢٣، لانیکەم ٢١.٧ ملیار دۆلار یارمەتیی سەربازی خستووەتە بەردەستی ئیسرائیل.

توێژینەوەیەکی دیکەش کە ئەویش ساڵی ڕابردوو لەلایەن پرۆژەی "تێچووی جەنگ(Costs of War) " لە قوتابخانەی واتسۆنی کاروباری نێودەوڵەتی و گشتیی زانکۆی براون بڵاوکراوەتەوە، دەریدەخات کە ئەمریکا لە دوو ساڵی پێش ئەوەدا نزیکەی ١٠ ملیار دۆلاری دیکەی بۆ یارمەتییە ئەمنییەکان و ئۆپەراسیۆنە جۆراوجۆرەکان لە ناوچەی ڕۆژهەڵاتی ناوەڕاست خەرجکردووە.