دۆناڵد ترهمپ، سهرۆكی ئهمریكا و عهلی زهیدی، سهرۆك وهزیرانی عێراق له پهیوهندییهكی تهلهفۆنیدا تاوتوێی پهسهرهندنهكانی ناوچهكه دهكهن و جهخت له گرنگیی هەماهەنگی و ڕاوێژکردن لەنێوان هەردو وڵات دهكهنهوه له پهیوهست به ئاڵنگارییەكان. سهرۆك وهزیرانی عێراق له پهیوهندییه تهلهفۆنییهكهدا جهختی له بەکارنەهێنانی خاكی عێراق بۆ دەستدرێژیکردنە سەر وڵاتانی دراوسێ كردۆتهوه لهگهڵ پێویستیی گرتنەبەری چارەسەری ئاشتییانە و دیالۆگی بونیاتنەر لهپێناو پاراستنی ئاسایشی ناوچەکە.
ئاوێنه: بهپێی راگهیهندراوێكی نوسینگهكهی، ئهمڕۆ پێنجشهممه، عهلی زهیدی، سەرۆک وەزیرانی عێراق پەیوەندییەکی تەلەفۆنی لەگەڵ دۆناڵد ترهمپ، سەرۆکی ویلایەتە یەکگرتووەکانی ئەمریکا ئەنجامداو تێیدا تاوتوێی دوایین پهرهسهندنهكانی ناوچەکە، پێشهاته ئهمنییهكان و ئاسۆکانی قۆناغی داهاتویان كردوه.
لە پەیوەندییەکەدا باس لە گرنگیی هەماهەنگی و ڕاوێژکردن لەنێوان هەردو وڵاتدا لهبارهی ئاڵنگارییەكانی ئێستا کرا لهگهڵ کارکردن بۆ پشتیوانیکردنی سەقامگیریی هەرێمی و زاڵكردنی زمانی دیالۆگ و دیپلۆماسی لە چارەسەرکردنی قەیرانەکاندا، بە شێوەیەک کە بەشدار بێت لە کۆنترۆڵکردنی گرژییەکان و ڕێگریکردن لە فراوانبونی بازنەی ململانێکان.
له پهیوهندییه تهلهفۆنییهكهدا سەرۆک وەزیرانی عێراق جەختی لە هەڵوێستی عێراق کردەوە کە داوای ڕێزگرتن لە سەروەریی وڵاتان و بەکارنەهێنانی خاکەکەی وەک بنکەیەک بۆ دەستدرێژیکردنە سەر وڵاتانی دراوسێ دەکات لهگهڵ پێویستیی گرتنەبەری رێگه چارەی ئاشتییانە و دیالۆگی بونیاتنەر، بە شێوەیەک کە ئاسایشی ناوچەکە و سەقامگیریی گەلانی ناوچهكه بپارێزێت.
هەردولا جەختیان لەسەر گرنگیی بەردەوامیی پەیوەندیی نێوان هەردو وڵات و ههماههنگكردنی هەڵوێستەکان كردهوه لهبارهی ئهو پرسانهی جێی بایهخی هاوبەشم، بە شێوەیەک کە پەیوەندییە دوقۆڵییەکان بەهێز بکات و خزمەت بە بەرژەوەندییە هاوبەشەکان بكات.