لە هەنگاوێکدا بەرەو بەدیجیتاڵیکردنی خزمەتگوزارییەکان و نەهێشتنی رۆتینی کارگێڕی، بانکی ناوەندیی عێراق سیستەمێکی نوێی ئەلیکترۆنی خستەکار کە تایبەتە بە گۆڕینەوەی دراوی کۆن و دڕاو لە رێگەی دەروازەی نیشتمانیی "ئوور"ەوە.
ئاوێنە: بەپێی راگەیەندراوێکی بانکی ناوەندی کە ئەمڕۆ یەکشەممە (18ـی تشرینی یەکەمی 2026) بڵاوکراوەتەوە، ئامانج لەم پرۆژە نوێیە کەمکردنەوەی بەفیڕۆچوونی کات و خێراکردنی پێشکەشکردنی خزمەتگوزارییەکانە بە هاووڵاتییان، بە جۆرێک لەمەودوا هەر کەسێک دەتوانێت لە هەر شوێنێکەوە بێت بە شێوەی ئۆنلاین داواکارییەکانی بەرز بکاتەوە.
لە راگەیەندراوەکەدا، بانکی ناوەندیی عێراق هەنگاوەکانی پێشکەشکردنی داواکارییەکەی بۆ هاووڵاتییان روونکردووەتەوە کە بەم قۆناغانەدا تێدەپەڕێت:
یەکەم: کردنەوەی هەژمارێکی تایبەت لەلایەن هاووڵاتییەوە لە رێگەی دەروازەی "ئوور"، یان راستەوخۆ لە رێگەی بەستەری فەرمیی (https://currency.app.cbi.iq)ـەوە.
دووەم: پڕکردنەوەی فۆڕمەکە بە زانیارییە کەسییەکان، کە پێکدێت لە ناوی چوارینە، ژمارەی مۆبایل بۆ پەیوەندیکردن، ناونیشانی نیشتەجێبوون و هاوپێچکردنی بەڵگەنامە فەرمییەکان.
سێیەم: دیاریکردنی جۆر و بڕی ئەو پارە کۆن یان دڕاوەی کە هاووڵاتییەکە مەبەستییەتی بیگۆڕێتەوە.
چوارەم: دوای ناردنی داواکارییەکە بە سەرکەوتوویی، لیژنەیەکی تایبەتمەند لە بانکی ناوەندی وردبینی لە زانیارییەکاندا دەکات، دواتر لە رێگەی پەیوەندییەوە، رۆژ و کاتی گونجاو بۆ سەردانیکردنی بانک و وەرگرتنی دراوە نوێیەکە بۆ داواکار دیاری دەکرێت.
لە کۆتایی راگەیەندراوەکەدا، بانکی ناوەندی جەختی لەوە کردووەتەوە کە بەگەڕخستنی ئەم پلاتفۆرمە بەشێکە لە ستراتیژیەتی دامەزراوەکە بۆ بەدیجیتاڵیکردنی کارەکان، کە دواجار دەبێتە هۆی بەرزکردنەوەی ئاستی متمانەی گشتی بە راژە بانکییەکان و رێگریکردن لە ئەرک و ماندووبوونی زیاتری هاووڵاتییان.