لە چوارچێوەی بەڕێوەچوونی کارەکانی "دیداری مێری" لە شاری هەولێر، ئەمڕۆ سێشەممە (١٣ی تشرینی یەکەمی ٢٠٢٦)، ڕێبەر ئەحمەد، وەزیری ناوخۆی حکومەتی هەرێمی کوردستان، چەند پرسێکی ئەمنی و ئاستەنگەکانی بەردەم سەقامگیریی ناوچەکەی تاوتوێ کرد.
لە سەرەتای وتەکانیدا، وەزیری ناوخۆ تیشکی خستە سەر پرسی تەشەنەسەندنی ماددە هۆشبەرەکان و هۆشداری دا کە لەم قۆناغەدا ئەم دیاردەیە بووەتە هەڕەشەیەکی جددی و گەورە بۆ سەر ئاسایشی عێراق. لە هەڵسەنگاندنێکیشدا بۆ قەبارەی ئەو مەترسییە، ناوبراو ئاماژەی بەوە دا کە زیان و لێکەوتەکانی ماددەی هۆشبەر زۆر زیاتر و قورسترن لەو مەترسییانەی کە لەلایەن تیرۆرەوە دروست دەکرێن.
لە تەوەری دووەمی قسەکانیدا کە تایبەت بوو بە پرسی روبەڕوبوونەوەی رێکخراوی چەکداریی داعش، ڕێبەر ئەحمەد رۆڵی هێزەکانی هاوپەیمانیی نێودەوڵەتیی بەرز نرخاند. ئەوەشی خستەڕوو کە تێکشکاندنی داعش پشتی بەستبوو بە هاوکارییەکانی هێزەکانی هاوپەیمانان و دووپاتیکردەوە، ئەگەر ئەو پاڵپشتییە بەردەوامە نەبوایە، بە دڵنیاییەوە دەرەنجامەکانی جەنگی دژ بە داعش بەم شێوەیەی ئێستا نەدەبوون و گۆڕانکاریی تێدا دەکرا.
لە کۆتاییدا، وەزیری ناوخۆی هەرێم ئاماژەی بە دۆخی ئەمنیی هەنووکەیی کرد و رایگەیاند کە جووڵە و هەڕەشەکانی رێکخراوی داعش لە ئێستادا روویان لە زیادبوون کردووە و پەرەیان سەندووە. لەبەر ئەو هۆکارەش، جەختی لەوە کردەوە کە بەرەنگاربوونەوەی ئەو رێکخراوە بەرپرسیارێتییەکی قورسە و پێویستی بە یەکخستنی هەوڵەکان و هەماهەنگیی هاوبەش هەیە لە نێوان سەرجەم لایەنە پەیوەندیدارەکاندا.