كه‌شناسی هه‌رێم رایده‌گه‌یه‌نێت، سبه‌ی سێشه‌ممه‌، له‌ به‌شێكی زۆری ناوچه‌كانی هه‌رێم باران ببارێت و پله‌كانی گه‌رماش چه‌ند پله‌یه‌ك نزم ده‌بنه‌وه‌.

ئاوێنه‌: كه‌شناسی هه‌رێم، ئه‌مشه‌و دوشه‌ممه‌، له‌ راگه‌یه‌ندراوێكدا وتی"پێشبینی دەکرێ سبەی سێشەممە ئاسمانی هەرێم هەوری تەواو بێت لە گەڵ دەستپێکردنی باران کە هەندێكجار هەورە بروسکەی لەگەڵ دەبێت."

ئه‌وه‌شی خستۆته‌ڕو، باران بارینه‌كه‌ لە کاتەکانی بەیانیدا لە ناوچە شاخاوییەکانی باکوری هەرێم و پارێزگای دهۆک و زاخۆ ده‌بێت و پاشان لە کاتەکانی نیوەڕۆدا کاریگەرییەکەی بە لاوازی دەرێژدەبێتەوە بۆ سەر ئیدارەی سۆران و ڕاپەڕین هەولێر و ناوچە شاخاوییەکانی و سلێمانی و هەڵەبجە و بەشێک لە ناوچەکانی گەرمیان.

هێمای بۆ ئه‌وه‌ش كردوه‌، لە کاتەکانی ئیوارەدا کەش ئاسایی دەبێتەوەو ئاسمانی هەرێم دەگۆڕێت بۆ پەڵەهەور و نیمچە هەور و بەرزترین پلەکانی گەرمی (2-3) نزم دەبێتەوە بە بەراورد بە پلەکانی گەرمی ئەمڕۆ.

كه‌شناسی هه‌رێم له‌ راگه‌یه‌ندراوه‌كه‌یدا بڕی باران بارینی 12 سه‌عاتی رابردوی ئه‌مڕۆ دوشه‌ممه‌ له‌ به‌شێك له‌ ناوچه‌كان خستۆته‌ڕو كه‌ به‌م شێوه‌یه‌ بوه‌:

سلێمانی 0.1 ملم

چەمچەماڵ دڵۆپ دڵۆپ

دهۆک دڵۆپ دڵۆپ

زاخۆ 0.1 ملم

خەبات 2.0 ملم

بارزان 0.2 ملم

هەڵشۆ 0.4 ملم

حاجی ئۆمەران 0.2 ملم