په‌رله‌مانی عێراق لێكۆڵینه‌وه له بڕوانامه‌ی په‌رله‌مانتاران ده‌كات و په‌رله‌مانتارێكیش ده‌ڵێت، ساختەکردنی بڕوانامە تاوانەو کورسی پەرلەمانیش قەڵغان نییە بۆ خۆدزینەوە لە لێپرسینەوه.
ئاوێنه: عه‌بدولحه‌مزە مونعیم خەفاجی، سەرۆكی فراكسیۆنی "بزوتنەوەی ئیدراك" لە پەرلەمانی عێراق، نوسراوێكی فەرمانگەی كاروباری كاگێڕی پەرلەمانی لە لاپەڕەی تایبەتی خۆی لە تۆڕی كۆمەڵایەتی بڵاوكردوەتەوە، تیایدا داوا لە سەرجەم پەرلەمانتارانی عێراق دەكات بڕوانامەكانی (پۆلی شەشی سەرەتایی و سێی ناوەندی و شەشی ئامادەیی) بهێنن، بۆ رەوانەكردنی بۆ وەزارەتی پەروەردە بە مەبەستی وردبیینكردن.
په‌رله‌مانتاره‌كه نوسیویەتی، هیچ پارێزبەندییەك نییە بۆ ساختەکاران، ساختەکردنی بڕوانامە تاوانەو کورسی پەرلەمانیش قەڵغان نییە بۆ خۆدزینەوە لە لێپرسینەوە.
ئه‌و داواشیكردوە وردبینییەکی گشتگیر لە بڕوانامە و بەڵگەنامەکانی پەرلەمانتاران بكرێت لە خولی پێنجەمەوە تا خولی یەكەم، نەک تەنها سنوردار بکرێت بە خولی ئێستا.
ئه‌وه‌ش له‌كاتێكدایه دەنگۆی ئەوە هەیە ژمارەیەكی بەرچاو لە پەرلەمانتارانی عێراق بڕوانامەكانیان ساختەبێت.