لەلایەن لایەنە پەیوەندیدارەکانەوە، کۆتاییهاتنی ئامادەکارییەکان بۆ ١٣ـەمین فێستیڤاڵی هەنار و پایزی هەڵەبجە ڕاگەیەندرا. بڕیارە فێستیڤاڵی ئەمساڵ جیاواز لە ساڵانی ڕابردوو، تایبەتمەندی ژینگەدۆستی بەخۆوە ببینێت و ڕێگە بە بەکارهێنانی پلاستیک نەدرێت.
ئاوێنە: ئەمڕۆ لە پارکی شاری یاری هەڵەبجە، بە ئامادەبوونی سەرپەرشتیاران و لایەنە پەیوەندیدارەکان، وردەکارییەکانی پەیوەست بە ١٣ـەمین فێستیڤاڵی هەنار و پایزی هەڵەبجە خرانەڕوو و ڕۆژی دەستپێکردنی چالاکییەکانیش دیاریکرا.
لە لێدوانێکدا، ستار مەحموود، وتەبێژی ١٣ـەمین فێستیڤاڵی هەنار و پایزی هەڵەبجە ڕایگەیاند، سەرجەم ئامادەکارییەکان بۆ بەڕێوەچوونی فێستیڤاڵەکە کۆتاییان هاتووە و بڕیارە ڕۆژی ٢٨ـی ئەم مانگە یەکەم ڕۆژی دەستپێکی فێستیڤاڵەکە بێت. هەروەها ئاماژەی بەوەشدا کە چالاکییەکان بۆ ماوەی چوار ڕۆژ بەردەوام دەبن و تێیدا ٥٥٢ باخەوان، خاوەنکار و ژنانی دەستڕەنگین بەرهەمەکانیان نمایش دەکەن.
لەبارەی هۆکاری درێژکردنەوەی ماوەی فێستیڤاڵەکە لە سێ ڕۆژەوە بۆ چوار ڕۆژ، وتەبێژی فێستیڤاڵەکە ڕوونیکردەوە کە ئامانج لەو هەنگاوە، کەمکردنەوەی ئەو جەنجاڵی و قەرەباڵغییە زۆرەیە کە ساڵانە لە کاتی بەڕێوەچوونی فێستیڤاڵەکەدا دروست دەبێت و ڕووبەڕووی گەشتیاران و سەردانیکەران دەبێتەوە.
تایبەتمەندییەکی دیکەی دیاری فێستیڤاڵی ئەمساڵ، وەک ستار مەحموود باسی لێوە کرد، بریتییە لە گرنگیدان بە پاراستنی ژینگە. ناوبراو جەختی لەوە کردەوە کە ئامانجیانە ئەمساڵ فێستیڤاڵێکی بێ پلاستیک و دۆستی ژینگە بەڕێوەببەن، بۆ ئەو مەبەستەش بە چڕی کاریان لەسەر کردووە و هەوڵدەدەن کەمترین پلاستیک بەکاربهێنرێت، تاوەکو فێستیڤاڵەکە جیاوازتر بێت لە ساڵانی ڕابردوو.