بافڵ تاڵەبانی هۆشداری لە خراپی دۆخی عێراق دەدات و رایدەگەیەنێت، ئەگەر دۆخی بەغدا خراپ بێت، کاریگەرییەکەی بۆ سەر هەرێمی کوردستان خراپتر دەبێت، هاوکات ئاماژە بەبوونی مەترسی ئەمنی و ئابووری دەکات لە ناوچەکەدا.
ئاوێنە: لەبارەی پەیوەندییەکانی نێوان هەولێر و بەغدا، بافڵ تاڵەبانی، سەرۆکی یەکێتی جەخت لە پێویستیی گۆڕینی سیاسەت و وتاری هەرێم دەکاتەوە و دەڵێت: "دەبێت سیاسەت و زمانی خۆمان بەرامبەر بە بەغدا بگۆڕین، چونکە سەرۆک وەزیرانی ئێستای عێراق جیاوازە و هیچ روانگەیەکی شۆڤێنی بەرامبەر بە کورد نییە." ئاماژەی بەوەش کردووە کە بەهێزی و یەکڕیزیی عێراق، راستەوانە دەبێتە هۆی بەهێزی و یەکڕیزیی کوردستان.
لەسەر ئاستی پرسە نەتەوەییەکان و پەیوەندییە هەرێمییەکان، بافڵ تاڵەبانی پێیوایە قەیرانەکانی ئێستا دەرفەتێکی گەورەن بۆ کورد. داواش دەکات هەمووان پشتیوانی لە پرۆسەی ئاشتی لە باکووری کوردستان (تورکیا) بکەن و کوردانی سوریا و ئێرانیش لەبیر نەکرێن. راشیدەگەیەنێت کە لەسەر مەترسییەکانی ناوچەکە و پرۆسەی ئاشتی، لەگەڵ کۆماری ئیسلامیی ئێراندا هاوئاهەنگن.