لە ئەنجامی ئەو گرژی و ئاڵۆزییانەی لە شاری حەسەكەی باكووری ڕۆژهەڵاتی سوریا (ڕۆژئاوای كوردستان) ڕوویاندا، ژمارەیەك هاووڵاتیی كورد بریندار بوون. ئەمەش دوای ئەوە هات كە بەشێك لە خۆپیشاندەرانی عەرەب هەوڵیاندان بەرەو ناوچە و گەڕەكە كوردییەكانی شارەكە پێشڕەوی بكەن، كە بەهۆیەوە هێزەكانی ئاسایشی ناوخۆ بۆ پاراستنی ئارامیی شارەكە و ڕووبەڕووبوونەوەی پشێوییەكان دەستوەردانیان كرد.
ئاوێنە: بەپێی سەرچاوە مەیدانییەكان، سەرەتای ڕووداوەكان بە گردبوونەوە و خۆپیشاندانی ژمارەیەك لە هاووڵاتیانی پێكهاتەی عەرەب لە سەنتەری شاری حەسەكە دەستی پێكرد. لە میانی ناڕەزایەتییەكاندا، دۆخەكە ئاڵۆزیی تێكەوتووە و بەشێك لە بەشداربووان ڕژاونەتە ناو كۆڵانەكانەوە و پەلاماری بەشێك لە موڵك و ماڵی گشتی و تایبەتیان داوە.
سەرچاوەی دروستبوونی ئەم ناڕەزایەتییانە لە گەڕەكی غوێرانەوە بووە، كە یەكێكە لە گەڕەكە گەورەكانی حەسەكە و دەكەوێتە باشووری ڕۆژهەڵاتی شارەكە و زۆرینەی دانیشتوانەكەی لە پێكهاتەی عەرەبن.
لە پێناو ڕێگریكردن لە تەشەنەسەندنی ئاڵۆزییەكان و پاراستنی سەروماڵی هاووڵاتیان، هێزەكانی ئاسایشی ناوخۆ ڕێوشوێنی توندیان گرتووەتەبەر، بەتایبەتی بۆ ئەوەی ڕێگری بكەن لە گەیشتنی خۆپیشاندەرەكان بە گەڕەكەكانی باكووری شارەكە. لە ئێستاشدا هێزە ئەمنییەكانی پارێزگاكە بە چڕی بڵاوەیان پێكراوە بۆ كۆنترۆڵكردنەوەی دۆخەكە و ڕووبەڕووبوونەوەی هەر هەوڵێكی تێكدەرانە.
لە لایەكی دیكەوە، سەبارەت بە هۆكاری خۆپیشاندانەكان، میدیا فەرمییەكانی حكومەتی سوریا گێڕانەوەیەكی جیاواز دەخەنە ڕوو. كەناڵی فەرمی سوریا لە هەواڵێكی بەپەلەدا ڕایگەیاندووە كە ئەو هاووڵاتیانەی حەسەكە گردبوونەتەوە، داواكارییەكەیان بریتییە لە چەسپاندنی ئاسایش و سەپاندنی سەروەریی دەوڵەتی سوریا بەسەر شارەكەدا.