وەزارەتی دەرەوەی ئەمریکا رایگەیاند، هاوپەیمانیی نێودەوڵەتیی لە کۆبوونەوەیەکدا بەڵێنی دابینکردنی زیاتر لە ٧٥ ملیۆن دۆلاریان بۆ هەردوو وڵاتی عێراق و سوریا تەرخانکردووە.
ئاوێنە: وەزارەتەکە بڵاویکردووەتەوە، هاوپەیمانیی نێودەوڵەتیی دژی داعش کۆبوونەوەیەکی تایبەتی لەسەر ئاستی بەڕێوەبەرانی سیاسی و بەرپرسانی باڵای دیپلۆماسی لە رۆمای پایتەختی ئیتاڵیا لەبارەی رەوشی عێراق و سوریا ئەنجامداوە؛ لە کۆبوونەوەکەدا هاوپەیمانان کۆتاییهاتنی ئەرکی ئۆپەراسیۆنی "ئیرادەی پۆڵایین"ـیان لە عێراق وەک سەرکەوتنێکی هاوبەش راگەیاند و بەڵێنی دابینکردنی زیاتر لە ٧٥ ملیۆن دۆلاریان بۆ هەردوو وڵات دووپاتکردەوە.
هاوکات کۆبوونەوەکە لە ١ـی تشرینی یەکەمی ٢٠٢٦ بە هاوسەرۆکایەتیی ئیتاڵیا و ویلایەتە یەکگرتووەکانی ئەمریکا بەڕێوەچووە.
بەپێی راگەیێندراوی وەزارەتی دەرەوەی ئەمریکا، هاوبەشانی هاوپەیمانییەکە پیرۆزباییان لە عێراق و سوریا کردووە بەبۆنەی سەرکەوتنی ئۆپەراسیۆنی سەربازیی هاوپەیمانان لە لاوازکردن و تێکشکاندنی داعش.
هاوپەیمانییەکە جەختیشیکردووەتەوە لە کۆتاییهاتنی ئەرکی هاوپەیمانان لە عێراق، هەروەها هاوپەیمانان نوێنەرایەتیی سەرکەوتنی راستەقینەی هەوڵە بەکۆمەڵەکان و پێداگریی حکومەتی عێراق دەکات بۆ بەردەوامیدان بە بەرپرسیارێتییەکانی لە پێناو رێگریکردن لە سەرلەنوێ سەرهەڵدانەوەی داعش.
پەیوەست سووریاشەوە، هاوپەیمانییەکە پێشوازی لە هەبوونی هاوبەشێک لە دیمەشق کرد کە مەترسییەکانی داعش دەناسێت و پێداگرە لەسەر کارکردنی هاوبەش لەگەڵ هاوپەیمانان بۆ نەهێشتنی ئەو هەڕەشەیە؛ هاوکات دووپاتیشیکردەوە کە "ئاسایشی بەردەوام لە هەردوو وڵاتدا بەستراوەتەوە بە بەهێزکردنی دامەزراوە نیشتمانییە سەروەرەکان کە نوێنەرایەتیی هەموو پێکهاتەکان بکەن".
دەربارەی بڕی تەرخانکراویش، بەشداربووانی کۆبوونەوەکە پابەندیی دارایی خۆیان بە بەهای زیاتر لە ٧٥ ملیۆن دۆلار دووپاتکردووەتەوە، ئەو بڕەیەش بۆ پاڵپشتیکردنی پێداویستییەکانی دژەتیرۆر لە سوریا، بەرزکردنەوەی توانای دەستبەسەرکردن و گرتووخانەکان، بەردەوامیدان بە خزمەتگوزارییە تەندروستییەکان و هاوکاریکردنی ئاوارە و دەستبەسەرکراوان لە هەردوو وڵاتی عێراق و سوریا تەرخان دەکرێت.
بە گوێرەی وەزارەتی دەرەوەی ئەمریکا، لە کاتی کۆبوونەوەکەدا، حکومەتی سوریا کارە سەرەکییەکانی لە بواری بەرەنگاربوونەوەی تیرۆر و کەموکوڕییەکانی بۆ پشتیوانیی نێودەوڵەتی خستەڕوو، لەبەرامبەردا حکومەتی عێراق بەردەوامیی رۆڵی سەرکردایەتیی خۆی بۆ تێکشکاندنی داعش دووپاتکردەوە.