كەشناسی هەرێم رایده‌گه‌یه‌نێت، باران بارین تاوه‌كو ئێواره‌ی ئه‌مڕۆ هه‌ینی به‌رده‌وام ده‌بێت و پله‌كانی گه‌رماش زیاتر نزم ده‌بنه‌وه.
ئاوێنە: بەڕێوەبەرایەتی گشتی کەشناسی و بومەلەرزەزانی ھەرێمی کوردستان لە راگەیەندراوێکدا وتی، ئەمڕۆ هەینی، ئاسمان لە نێوان نیمچە هەور و هەوری تەواو دەبێت، نمە باران و بارانی مامناوەند بە پچڕپچری لە زۆربەی ناوچەکان بەردەوامی دەبێت بەتایبەت لە سنوری پارێزگای سلێمانی و ئیدارەی سۆران و هەندێک لە ناوچەکانی ڕۆژهەڵاتی هەرێم کاریگەری دابارین زیاتر دەبێت و لە هەندێک کاتدا هەورە بروسکەی لەگەڵ دەبێت. لە ئێوارەدا کاریگەری باران بارین لەسەر ناوچەکەمان لاواز دەبێت.
ئه‌وه‌شی خستۆته‌ڕو، ئه‌مڕۆ پله‌كانی گه‌رما، 1 تا 2 پله نزمتر ده‌بن له‌چاو تۆماركراوه‌كانی دوێنێ.
هەر بەپێی راگەیەندراوەكە، سبه‌ی شه‌ممه ئاسمان بە گشتی نیمچە هەور دەبێت، لە ناوچە شاخاوییەکان و ناوچە سنورییەکان ئەگەری بارینی کەمێک نمە باران هەیه‌و پلەکانی گەرماش نزیك ده‌بن له تۆماركراوه‌كانی ئه‌مڕۆ.
كەشناسی هەرێم پێشبینی كردوە بەرزترین پلەکانی گەرمای پێشبینیکراو بۆ سبەی بەم جۆرە بن: ھەولێر: 29، سلێمانی: 25، دھۆک: 27، ھەڵەبجە: 28، زاخۆ: 30، حاجی ئۆمەران: 20، سۆران: 27، گەرمیان: 33 پلە.