كۆمپانیای نه‌وتی سوریا رایده‌گه‌یه‌نێت، رۆژانەی 57 تانكەر بەنزین رەوانەی عێراق دەكرێت و بە نیازن بۆ 200 تانكەری رۆژانە بەرزی بكەنەوه. ده‌شڵێت، رۆژانه 1000 بۆ 1200 تانكەر نەوت لە عێراقەوە دەچێتە ناو خاكی سوریا.
ئاوێنه: کۆمپانیای سوری بۆ نەوت، ئەمڕۆ یەکشەممە رایگەیاند، لە چوارچێوەی رێککەوتنێکی سێ مانگیدا کە شیاوی نوێکردنەوەیە، دەستکراوە بە گواستنەوەی ئەو بەنزینەی بۆ عێراق هه‌نارده کراوە لەڕێگەی بانیاسەوە.
ئەحمەد قوبەجی، جێگری بەڕێوەبەری جێبەجێکار کەرتی گواستنەوەو کۆگاکردن لە کۆمپانیاکە، لە لێدوانێکدا بە ئاژانسی "سانا"ی رایگەیاندوە: پرۆسەی گواستنەوەکە لە رۆژی پێنجشەممەوە دەستیپێکردوە بە بڕی 57 تانکەر لە رۆژێکدا، هەروەها هەوڵەکان بەردەوامن بۆ بەرزکردنەوەی توانای کارکردن بۆ نزیکەی 200 تانکەر لە رۆژێکدا لەڕێگەی دەروازەی تەنه‌فەوە.
ئاماژەی بەوەش کرد، کۆمپانیای UCCی قەتەری بەرپرسە لە کڕینی بەنزین لە سەرچاوە جیهانییەکانەوە، لە کاتێکدا لایەنە سورییەکان بەرپرسن لە پرۆسەی گواستنەوە لە بەرامبەر کرێی ترانزێت، هەروەها رونی کردوەتەوە، گۆڕەپانەکانی بارکردن لە بانیاس ئامادەکراون بە هەشت شوێنی تایبەت بۆ پڕکردنەوەی تانکەرەکان.
قوبەجی باسی لەوەش کرد، ژمارەی تانکەرەکانی نەوتی عێراق کە بە خاکی سوریادا تێدەپەڕن لە ئێستادا لە نێوان 1000 بۆ 1200 تانکەردایە لە رۆژێکدا، لە هەمان کاتدا دیمەشق تاوتوێی فراوانکردنی پرۆسەکانی ترانزێت دەکات بۆ ئەوەی ماددەی دیکە بگرێتەوە، لەوانە خەڵوزی بەردین و گۆگرد.