ئا: ئاوێنە
ئوم کەلسووم، گۆرانیبێژی ناوداری میسری، لە چیرۆکێکی کۆندا دەربارەی ڕۆژانی منداڵی ئەوەی ئاشکرا کردووە کە هاتنە ناو جیهانی گۆرانی وتن بە بەڵێنێکی زولبیا دەستی پێکرد، ڕووداوێک کە دواتر ڕێڕەوی ژیانی هونەری گۆڕی.
ئوم کەلسووم، یەکێک لە گۆرانیبێژە بەناوبانگەکانی مێژووی مۆسیقای عەرەبی، لە چاوپێکەوتنێکدا کە ساڵانێک لەمەوبەر لە "ئیتیلاعاتی هەفتانە"ی ئێراندا بڵاوکراوەتەوە، باسی لە ڕۆژانی منداڵی و سەرەتای کاری هونەری خۆی لە جیهانی گۆرانی وتن کردووە؛ چیرۆکێک کە تێیدا قاپێک زولبیا ڕۆڵێکی سەرنجڕاکێشی هەبووە لە سەرەتای ژیانی گۆرانی وتنیدا.
ئەم چاوپێکەوتنە لە ٢٦ی تشرینی یەکەمی ١٩٤٥دا بڵاوکراوەتەوەو تێیدا بە پێچەوانەی وێنەی ئاسایی ژیانی ئەستێرەیەکی گەورەی مۆسیقا، ئوم کەلسووم باسی بەخت و ڕووداوێکی بچووکی منداڵی کردووە وەک یەکێک لەو هۆکارانەی کە وای لێکردووە بچێتە ناو جیهانی گۆرانی وتنەوە.
ئوم کەلسووم چۆن دەستی بەگۆرانی وتن کرد؟
لەم گێڕانەوەیەدا ئوم کەلسووم دەڵێت لە منداڵیدا لە کاتی یاریکردن بەبووکەڵەکەیدا گۆرانی فۆلکلۆری بۆ دەگوت کە لە دەوروبەری بیستبوو. باوک و براکەی تاکە گوێگرانی ئەو گۆرانییە منداڵانە بوون، بەڵام زۆری نەخایاند باوکی سەرنجی بەهرەی کچەکەی دا.
باوکی ئوم کەلسووم پێی وابوو ئەگەر کچەکەی فێری مۆسیقا ببێت، دەتوانێت ببێتە گۆرانیبێژێکی بەتوانا. بەڵام لەو تەمەنەدا ئوم کەلسووم حەزێکی کەمی بۆ گۆرانی وتن بۆ کەسانی دیکە هەبووە و زیاتر سەرقاڵی یارییە منداڵانەکەی خۆی بووە.
پێشنیاری باوک بۆ گۆرانی وتن لە ئاهەنگێکدا
کاتێک مانگی ڕەمەزان گەیشت، باوکی ئوم کەلسووم ئاگاداری دەکاتەوە کە دەچنە ماڵی یەکێک لەخاوەن نووسینگەیەکی نوتەری و داوای لە کچە بچووکەکەی کرد کە گۆرانی بۆ میوانەکانی ئاهەنگەکە بڵێت.
ئوم کەلسووم تەمەن پێنج ساڵان سەرەتا بەرەنگاری ئەو پێشنیارە بووەوە، بەڵام زۆری نەخایاند باوکی ڕێگەیەکی بۆ قەناعەت پێکردنی دۆزیەوە. بەکچەکەی وت ئەگەر بچیتە ئاهەنگەکە دەتوانێ قاپێک زولبیا بخوات.
ئەم بەڵێنە بەس بوو بۆ گۆڕینی بیروڕای منداڵە پێنج ساڵانەکە. ئوم کەلسووم کە زۆر حەزی لە زولبیا بوو، بە خۆشحاڵییەوە خۆی ئامادە کرد بۆ ئەوەی بچێتە ئاهەنگەکە، تەنانەت زووتر لە باوک و براکەی بەرەو شوێنی ئاهەنگەکە بەڕێکەوت.
خەڵاتی یەکەمین نمایشی ئوم کەلسووم چی بوو؟
لەو ئاهەنگەدا ئوم کەلسووم یەکەم "مووچە"ی وەرگرت؛ مووچەیەک کە پارە نەبوو، بەڵکو قاپێک زولبیا بوو.
لە بیرەوەرییەکانیدا باسی لەوە کردووە کە بۆ دوو ساڵی داهاتوو هەر جارێک دەچێتە شوێنێک بۆ گۆرانی وتن، پاڵنەری سەرەکی یان زولبیا بووە یان بووکەڵەیەکی فەرەنسی. لەو ماوەیەدا نە هیچ پارەیەکی وەرگرتووە و نە باوکی ڕێگەی بە کەسانی دیکە داوە پارەی بدەن.
دوای چەند ساڵێک و لە تەمەنی حەوت ساڵیدا، وەستایەکی بەناوبانگی مۆسیقای قاهیرە، بۆ یەکەمین کۆنسێرتی گۆرانی وتن، دراوێکی زێڕینی بە ئوم کەلسووم بەخشی. ئەویش لە بەرامبەردا ئەم داهاتە یەکەمەی لە گۆرانی وتنەوە بەخشی بە براکەی.
باوکی ئوم کەلسووم چۆن ڕێبازی هونەری کچەکەی داڕشت؟
ئوم کەلسووم لە بیرەوەرییەکانیدا بەردەوام بوو و جەختی لەوە کردەوە کە ئەگەر باوکی نەبوایە، ڕەنگە ڕێبازی ژیانی هونەری ئەو بە تەواوی جیاواز بووایە.
بە گوتەی ئەو، هەر لە سەرەتای ژیانییەوە، جگە لەوەی هانی دەدا بۆ گۆرانی وتن، باوکی ڕۆژانە کاتێکی بۆ فێرکردنی شیعر و ئەدەبی عەرەبی تەرخان دەکرد.
باوکی ئوم کەلسووم پێیوابوو کە گۆرانیبێژ نەک تەنیا نابێت دەنگێکی باشی هەبێت؛ هەروەها پێویستە ئاشنا بێت بە ئەدەب و چیرۆکی سەرنجڕاکێش و خاڵە وردەکان و بابەتگەلێکی جۆراوجۆر بزانێت.
ئەم فێرکردنانە دواتر بۆ ئوم کەلسووم گرنگتر بوون. لەم گێڕانەوەیەدا دەڵێت کە کاتێک ناوبانگێکی زۆری بەدەستهێنا و بەشداری لە کۆبوونەوەی پاشا و گەورەکاندا دەکرد، بە تەواوی لە بەهای ئەو فێرکاریانە تێگەیشت کە باوکی لە منداڵیدا پێی بەخشیبوو.
ئوم کەلسووم: ئەگەر باوکم نەبوایە چی ڕووی دەدا؟
لەم یادەوەرییەدا، ئەو گۆرانیبێژە بەناوبانگەی میسری ڕۆڵی باوکی لە سەرکەوتنەکانیدا بە زۆر بەرچاو زانیوە و جەختی لەوە کردەوە کە بەبێ پاڵپشتی و ڕاهێنانی ئەو ڕەنگە تەنانەت ئەو گۆرانییە فۆلکلۆریانەی لەبیرکردبێت کە لە تەمەنی منداڵیدا یان لە تەمەنی گەنجیدا دەیوتەوە.
هەروەها جەختی لە گرنگی هەوڵدان شانبەشانی بەخت کردەوە، پێیوابوو سەرکەوتن تەنها دەرئەنجامی بەخت نییە. لە ڕوانگەی ئەوەوە بەخت دەتوانێت ژیانی مرۆڤ بگۆڕێت کاتێک کەسەکە ئامادەکاری و هەوڵی پێویستی هەبێت بۆ قۆستنەوەی دەرفەتەکە.
