بەپێی وتەی یاسر حه‌جاج باڵیۆزی عێراق له تاران، ڕاگرتنی گەشتە ئاسمانییەکان لەنێوان عێراق و ئێران هەنگاوێکی کاتی و راگوزەرە، و کاریگەری لەسەر پتەویی پەیوەندیە مێژووییەکان کە دوو وڵات و دوو گەلی دراوسێ بەیەکەوە دەبەستنەوە نابێت.
ئاوێنە: باڵیۆزی عێراق له تاران لە لێدوانێکدا بە ئاژانسی هەواڵی ناوەندی وت "حکومەتی عێراق بەردەوامە لە هەوڵ و پەیوەندییە چڕەکانی بۆ دووبارە دەستپێکردنەوەی گەشتە ئاسمانییەکان لەنێوان تاران و بەغدا و گەڕاندنەوەی جووڵەی فڕۆکەوانی بۆ بارودۆخی ئاسایی لە کورتترین کاتدا".
باڵیۆزی عێراق ڕوونیکردەوە کە ڕاگرتنی فڕۆکەکان بەهیچ شێوەیەک کاریگەری لەسەر قووڵیی پەیوەندیە نێودەوڵەتییەکان نێوان بەغدا و تاران نابێت، ئاماژەی بەوەشدا کە بەرپرسە عێراقییەکان کار دەکەن بۆ تێپەڕاندنی ئەم بارودۆخە "کارەساتباریانە" بە خێرایی.
وتیشی "دووبارە دەستپێکردنەوەی گەشتەکان تەنها بە لایەنی گەشتیاری یان گەشتکردن سنوردار نییە، بەڵکو گرنگە بۆ بەشێکی فراوانی هاوڵاتییانی عێراقی کە ڕاستەوخۆ کاریگەری لەسەریان دەبێت لەلایەن ڕاگرتنی جووڵەی فڕۆکەوانییەوە".
حەجاج لە کۆتاییی قسەکانیدا جەختی لەسەر ئەوە کردەوە کە پەیوەندییەکانی هەردوو وڵات "قووڵترن" لەوەی کاریگەریان لەسەر بارودۆخێکی نائاسایی و کاتی ببێت، جەختیشیکردەوە کە بەستنراوە مێژوویی و کۆمەڵایەتی و کولتووری و بەرژەوەندییە هاوبەشەکانی نێوان دوو وڵاتەکە بنەمایەکی پتەون بۆ بەردەوامیی هاوکاری و هاوئاهەنگی نێوانیان.