فه‌ریق روكن به‌ختیار محه‌مه‌د، ئه‌مینداری گشتیی وه‌زاره‌تی پێشمه‌رگه رایگه‌یاند، هاوپه‌یمانیی نێوده‌وڵه‌تی هاوكارییه داراییه‌كانی بۆ پێشمه‌رگه راگرت.
ئاوێنه: فه‌ریق روكن به‌ختیار محه‌مه‌د، ئه‌مینداری گشتیی وه‌زاره‌تی پێشمه‌رگه، ئه‌مڕۆ شه‌ممه، به ئاژانسی هه‌واڵی عێراقی راگه‌یاند، "ماوەی دیاریکراو بۆ هاوكارییه داراییەکانی هاوپەیمانیی نێودەوڵەتی بۆ هێزەکانی پێشمەرگە بەپێی ڕێککەوتنی نێوان هەردو لا کۆتایی پێهاتوە."
وتیشی "یارمەتییە داراییەکانی مانگەکانی ئاب و ئەیلولی 2026 دوا گوژمە بون بەپێی ڕێککەوتنەکە".
ئه‌وه‌شی خسته‌ڕو "یاداشتی لێکتێگەیشتنەکە لە 21ی ئەیلولی 2022 تا 21ی ئەیلولی 2026 بەردەوام بو، واتە بۆ ماوەی چوار ساڵ، ئێستاش یاداشتەکە کۆتایی پێهاتوه، بەوەش ناردنی بڕە پاره‌كان لەلایەن هاوپەیمانانەوە کۆتایی هات".
وه‌ك ئه‌مینداری گشتیی وه‌زاره‌تی پێشمه‌رگه‌ش ئاماژه‌ی پێداوه، وەزارەته‌كه‌یان پێشتر گه‌یشتنی هاوكارییه داراییەکانی هاوپەیمانانی بۆ مانگەکانی ئاب و ئەیلولی ئه‌مساڵ راگه‌یاند كه ڕۆژی پێنجشەممەی ڕابردو ڕێکەوتی 24ی ئەیلول دابەش کرا و ئەمەش دوا گوژمە بوە بەپێی ڕێککەوتنەکە.
بەختیار محه‌مه‌د وتیشی "داوامان لە حکومەتی فیدراڵی کردوە قەرەبوی ئەم هاوكارییانه بکاتەوە بە هەموارکردنی موچەی پێشمەرگە هاوشێوەی هێزەکانی دیکەی عێراق."