سه‌رۆكایه‌تی كۆماری عێراق رایگه‌یاند، روفاتی 153 ئەنفالكراو لە بیابانی سەماوە رادەستی هەرێمی كوردستان كرانەوە و لە چەند رۆژی داهاوشدا حەوت گۆڕی بە كۆمەڵی تر هەڵدەدرێنەوە.
ئاوێنه: سەرۆکایەتی کۆماری عێراق، ئەمڕۆ شەممە، رایگەیاند، روفاتی 153 قوربانی پرۆسەکانی ئەنفال رادەستی هەرێمی کوردستان كرانه‌وه، بەمەبەستی گواستنەوەیان بۆ پارێزگای سلێمانی و ئەنجامدانی رێوڕەسمی بەخاکسپاردنەوەیان لە مەزارگەی هەمیشەییان.
فه‌رمانگه‌ی پاراستنی گۆڕه به‌كۆمه‌ڵه‌كان و بێسه‌روشوێنانی عێراق رایگه‌یاند، هه‌ر 153 روفاته‌كه، روفاتی ژنان و منداڵانی ئه‌نفالكراون.
هه‌روه‌ها عەلی شوکری، سەرۆکی دەستەی راوێژکاران لە سەرۆکایەتی کۆمار، لە کۆنگرەیەکی رۆژنامەوانی هاوبەشدا لەگەڵ شاندێکی وەزارەتی شەهیدان و ئەنفالکراوانی هەرێم رایگەیاند، ئەم روفاتانە لەناو گۆڕی بەکۆمەڵدا لە ناوچەی "تەل شێخ" لە بیابانی سەماوە دۆزراونەتەوە، پرۆسەی رادەستکردنەوەکە بە هەماهەنگی لەنێوان وەزارەتی تەندروستی و دامەزراوەی شەهیدانی فیدراڵیدا ئەنجامدراوە.
جەختی لەوەش کردەوە، سەرجەم رێکارە تەکنیکی و یاساییەکانی تایبەت بەم روفاتانە تەواو کراون و ئامادەکاری دەکرێت بۆ هەڵدانەوەی حەوت گۆڕی بەکۆمەڵی دیکە لە هەمان ناوچەدا لە رۆژانی داهاتودا، بەمەبەستی کۆتاییهێنان بە دۆسیەی روفاتی گۆڕە بەکۆمەڵەکان لەو ناوچەیەدا.