كه‌تبیه‌كانی حزبوڵای عێراق داوا له گه‌لی عێراق ده‌كات هه‌مو رێگه‌یه‌ك بگرنه‌به‌ر بۆ شكاندنی گه‌مارۆی ئه‌مریكا له‌سه‌ر ئێران و ده‌شڵێت، ئه‌و لایه‌ن و كۆمپانیایانه‌ی ملكه‌چی بڕیاره‌كانی ئه‌مریكا بون بۆ گه‌مارۆی سه‌ر ئێران، "بێ كه‌رامه‌تن."
ئاوێنه: كه‌تیبه‌كانی حزبوڵای عێراق، ئه‌مڕۆ پێنجشه‌ممه، له راگه‌یه‌ندراوێكدا وتویه‌تی، ئه‌مریكا به‌هۆی ده‌سته‌وه‌ستانییه‌وه له شكاندنی ئیراده‌ی گه‌لی ئێران له روبه‌ڕوبونه‌وه‌ی سه‌ربازیدا، په‌نای بۆ چه‌كی گه‌مارۆ و ئابڵوقه بردوه تا "جەستەی بێتاوانەکان دابڕزێنێت."
به‌قسه‌ی حزبوڵای عێراق "سیاسیەتی ئەمریکی مامۆستایە لە گۆڕینی بژێوی و نانی گەلان بۆ ئامرازێکی تاوانکاری تا کۆنتڕۆڵی چارەنوسیان بکات."
وتوشیه‌تی"هاواری منداڵانی عێراق لە نەوەدەکانی سەدەی ڕابردودا بەهۆی ئابڵۆقە زۆردارانەکەوە زۆر دور نییە؛ ئەمڕۆش ئەم تاوانکارییە سیستماتیکەی زایۆنی و ئه‌مریكی نوێ دەبێتەوە تا گەلانی ناوچەکە لە فەلەستین، یەمەن و ئێران بگرێتەوە؛ جارێک لە ڕێگەی سڕکردنی سەرمایە و ئەوەی پێی دەوترێت سزای ئابوری و جارێکی دیکە لە ڕێگەی داخستنی ئاسمان و داخستنی سنورەکان."
به‌بڕوای كه‌تیبه‌كانی حزبوڵای عێراق "له‌میانی ئه‌م دڕندایه‌تییه‌دا، دوڕویی شەرمەزارکەرانەی ئەو سیاسەتمەدارانە دەردەکەوێت کە ترسنۆکییان کردوەتە سەرین و ملکەچییان داوه به‌خۆیاندا، وەک ئەوەی برسیکردنی گەلان، قڕکردنیان و کوشتنی منداڵان کارێکی ڕەوا بێت."
كه‌تیبه‌كانی حزبوڵای عێراق پێشی وایه "ئەو لایەن و کۆمپانیایانەی کە ڕازی بون بە ملکەچبون و ڕسوایی بۆ بڕیارە زۆردارەکانی ئەمریکا لە پێناو بەرژەوەندییەکاندا، ڕۆڵی پشتیوانێکی زەلیلیان بۆ بڕیارە ئەمریکی-زایۆنییەکان هەڵبژاردوە؛ ئەوانە لایەن و کۆمپانیای بێ کەرامەتن، دوای ئەوەی بەشداربون لە خنکاندنی دراوسێکانیان و توندکردنی ئابڵۆقە لەسەر گەلە ئیماندارەکەی."
وتوشیه‌تی "له‌گه‌ڵ بڕوای ته‌واومان به‌وه‌ی كه گه‌مارۆ ئیراده‌ی گه‌لانی ئازاد لاواز ناكات... بانگەواز ئاراستەی ڕۆڵەکانی گەلی عێراقی سەربەرزمان دەکەین هه‌مو رێگه‌یه‌ك بگرنه‌به‌ر بۆ شکاندنی ئەم گه‌مارۆیه له‌پێناو پشتیوانیکردنی گەلی ئێرانی برا؛ بەتایبەتی لە ڕێگەی پشتیوانیکردنی بەرهەمەکانی و هاندانی ئاڵوگۆڕکردنیان و بەشدارینەکردن لە هەر چالاکییەک کە مەینەتی ستەملێکراوان زیاتر بکات."
حزبوڵا له كۆتایی راگه‌یه‌ندراوه‌كه‌یدا ئه‌و پرسیارە ئاراستەی مەڕجەعەكانی شیعه كردوه كه "حوکمی شه‌رعی چییە بۆ یارمەتیدانی دوژمنان - بە هەر شێوەیەک بێت- بۆ ئابڵۆقەدانی گەلی ئێرانی ئیماندار و برسیکردنی؟"