مەسعود پزیشکیان، سەرۆککۆماری ئێران و عەباس عێراقچی، وەزیری دەرەوەی ئەو وڵاتە، بە مەبەستی بەشداریکردن لە کۆبوونەوەکانی کۆمەڵەی گشتیی نەتەوە یەکگرتووەکان لە ویلایەتە یەکگرتووەکانی ئەمریکان. ئەم سەردانە هاوکاتە لەگەڵ هەڵوەشاندنەوەی زۆربەی گەشتە ئاسمانییەکانی وڵاتان بۆ ئێران، کە پرسیاری لەسەر چۆنیەتی و ڕێگەی گەڕانەوەی ئەو شاندە دروست کردووە.
ئاوێنە: لەو چوارچێوەیەدا، سکۆت بێسێنت، وەزیری گەنجینەی ئەمریکا لە چاوپێکەوتنێکدا لەگەڵ کەناڵی فۆکس نیوز، وردەکاریی نوێی سەبارەت بە ڕاگرتنی گەشتە ئاسمانییەکان و کاریگەرییەکانی لەسەر شاندەکەی ئێران خستەڕوو.
بە گوتەی وەزیری گەنجینەی ئەمریکا، لە ٢٣ی ئەیلوولەوە ڕێکارەکان توندتر کراون و ئاستەنگی گەورە بۆ سەرجەم هێڵە ئاسمانییەکانی ئێران لە ئاستی جیهاندا دروست بووە. بێسێنت ئاماژەی بەوە دا کە لەسەدا ٨٠ بۆ ٩٠ی گەشتە ئاسمانییەکان بۆ ئێران هەڵوەشێندراونەتەوە، هەر بۆیە دڵنیا نییە لەوەی شاندەکەی ئێران لە نیویۆرکەوە چۆن دەتوانن بگەڕێنەوە بۆ وڵاتەکەیان.
سەبارەت بە سروشتی سزاکان، سکۆت بێسێنت ڕوونی کردەوە کە ڕێکارەکان گشتگیرن؛ ئەگەر فڕۆکەکانی ئێران لە هەر فڕۆکەخانەیەکی جیهاندا بنیشنەوە، نابێت بە هیچ شێوەیەک سووتەمەنییان پێ بدرێت، یان خزمەتگوزاریی نیشتنەوەیان بۆ دابین بکرێت. هاوکات بڕیارەکە فرۆشتنی بلیت بەو هێڵانەش قەدەغە دەکات.
لە کۆتاییدا هۆشدارییەکی توندی دا و ڕایگەیاند، هەر کەس، لایەن، یان فڕۆکەخانەیەک سەرپێچی ئەم ڕێنماییانە بکات و خزمەتگوزاری بە فڕۆکەکانی ئێران بدات، ڕاستەوخۆ سزادەدرێت و لە سیستەمی دارایی دۆلاری ئەمریکی بێبەش دەکرێت.