قوباد تاڵه‌بانی، جێگری سه‌رۆك وه‌زیرانی هه‌رێم ستیڤ فه‌یگن، هه‌ڵسوڕێنه‌ری كاروباری باڵیۆزخانه‌ی ئه‌مریكا له عێراق له كۆبونه‌وه‌ی نێوانیاندا جه‌خت له پێویستیی چارەسەرکردنی خێرای ناکۆکییەکان و پێکهێنانی کابینەی نوێی حکومەتی هەرێم ده‌كه‌نه‌وه.
ئاوێنه: به‌پێی راگه‌یه‌ندراوێكی نوسینگه‌كه‌ی، ئه‌مڕۆ دوشه‌ممه، قوباد تاڵەبانی، جێگری سەرۆک وەزیرانی هه‌رێم له هه‌ولێر پێشوازیکرد لە باڵیۆز ستیڤ فەیگن، هەڵسوڕێنەری کاروباری باڵیۆزخانەی ئەمریکا لە عێراق و پێکەوە تاوتوێی دۆخی سیاسی هەرێمی کوردستان و عێراق و چەند پرسێکی دیکەی جێی بایەخی هەردولایان کرد.
وه‌ك له راگه‌یه‌ندراوه‌كه‌دا هاتوه، لە تەوەرێکی کۆبونەوەکەدا باس لە دۆخی سیاسیی ناوخۆی هەرێمی کوردستان کرا. هەردولا هاوڕابون لەسەر پێویستیی چارەسەرکردنی خێرای ناکۆکییەکان و پێکهێنانی کابینەی نوێی حکومەتی هەرێم. هەروەها جەختیان کردەوە لەسەر کارکردنی پێکەوەیی هەمو لایەنەکان بۆ پاراستنی هەرێمی کوردستان لە هەر جۆرە هەڕەشە و مەترسییەک کە بەهۆی ئاڵۆزییەکانی ناوچەکەوە روبەروی هەرێم ببێتەوە.
به‌گوێره‌ی راگه‌یه‌ندراوه‌كه، سەبارەت بە پرسی نەوت و گازیش، قوباد تاڵەبانی ئاماژەیدا بە گرنگیی چارەسەرکردنی ناکۆکییەکانی نێوان هەرێم و بەغدا و رونیکردەوە کە ئەولەوییەتی هەرێمی کوردستان دابینکردنی پێداویستییەکانی ناوخۆیە و پاشان هەناردەکردنییەتی.
هه‌ر به‌گوێره‌ی راگه‌یه‌ندراوه‌كه، لە بەشێکی دیکەی کۆبونەوەکەدا باس لە دۆخی عێراق کرا. لەمبارەیەشەوە هەردولا هاوڕابون لەسەر پێویستیی پشتگیریکردنی حکومەتی عێراق و هەنگاوەکانی سەرۆک وەزیران بۆ چەسپاندنی سەروەریی یاساو دورخستنەوەی عێراق لە بارگرژییەکانی ناوچەکە. هەروەها جەختیش کرایەوە لەسەر بەهێزترکردنی پەیوەندییەکانی نێوان هەرێم و بەغداو چارەسەرکردنی کێشەکان بەپێی دەستورو هەماهەنگی و پێکەوەکارکردنی هەردو حکومەتی هەرێم و بەغدا بۆ باشترکردنی دۆخی خزمەتگوزارییەکان و هەنگاونان بەرەو گەشەپێدانی ئابوریی عێراق.