نەوزاد بەندی 

هەموویان

بە جێیان هێشتین ..

تەنها مێزێکی تەختە و 

دوو کورسی دار و 

دوو کوپ قاوە نەبێ،

کە ئێمە بەجێمان هێشتن ..!

٭      ٭      ٭

هەژارەکان قەت ددانیان نائێشێ،

چونکە ددانیشیان بئێشێ،

پارەی چونە لای ددانسازیان پێ نییە،

هەر بۆیە هەژار و ئازار و ددانساز و ددان،

ڕێککەوتننامەیەکیان واژۆ کردووە،

کە ئەو بابەتە دابخەن ..

هەژارەکان ناچنە ناو قەڵەباڵغیی 

بەڕێوەبەرایەتیی هات و چۆوە،

هەژار و مۆڵەتنامەی شۆفێریی و ساڵانە و بەڕێوەبەڕێوەبەری هاتوچۆ و سەرۆک وەزیران و ئوتومبیل، ڕێککەوتننامەیەکیان مۆر کردووە،

کە چیدی ئەو بابەتە نەخەنە بەر باس ..

هەژارەکان ناچنە ناو ڤێلا و فڕۆکە و 

بەڕێوەبەرایەتیی پاسپۆرت و ئوتێلی پێنج ئەستێرە و ئێر پۆت و ئایفۆن و سێچارەک ..

ڕێککەوتننامەیەکی سەد قۆڵییان ئیمزا کردووە، 

کە نە ئەم لە هێڵە سوورەکانی ئەوان نزیک بێتەوە و 

نە ئەوانیش هیچ نۆتیفیکەیشن و ڕیکلامێ،

بۆ ئەم بنێرن ..

هەژارەکان قەت توشی جیوبی ئەنفی و دابەزینی ڤیتامین دی و ئایرۆن و پوکانەوەی ئێسک و کزبوونی چاو نابن، 

چونکە لای ئەوان، ئەوانە نەخۆشی نین و .. وەک ڕەحەتەلقوم قوتیان ئەدەن..

دەردی قورسی ئەوان، کرێ خانوو و خۆراکە ..

پێڵاو شێرپەنجە و پۆشاکە ..

کە هیچ جۆرە دانوستانێکیان قبوڵ نییە و

بەردەوام هەڕەشەی جەنگ و هێرشیان

لێ دەکەن ..

لە فەرهەنگی هەژارەکانا ووشەی دۆندرمە و قاوە و کێک و مەدالیا و چەرەس و ترشیات و موقەبیلات و مێز و کورسی و دەعوەت و پیاسە و عەتر و بۆینباخ ، نین ..

٭        ٭         ٭

کە ئێوارە نەهاتیتەوە،

وامزانی خۆم نەگەڕاومەتەوە ..

٭       ٭       ٭

هەموو عەسرێ،

دڵم لە لێدان ئەکەوێ ..

هاوڕێیەکم دێ،

بە بێ تاقەتیی،

بە بێ سێ و دوو،

زەنگەکانی دڵم ئەخاتەوە کار ..

ئیتر نازانم 

پیلەکانیان ئەگۆڕێ ..

شەحنیان ئەکا ..

یان به جادوو ..

٭       ٭       ٭

پیریی بۆیە قورس و کارەساتە، 

سنوورەکانی ژیانی بە قاچاخ بڕیوە و

خۆی تەسلیمی 

پۆلیسەکانی مردن نەکردووە ..

لەو شوێنە کێشە لەسەرانە، 

بێ نان

بێ ددان

بێ ئۆکسجین

بێ جومگە و ئێسقان،

بەردەوامە لەسەر 

مانەوەی نایاسایی ..

٭     ٭     ٭

هەر ووڵاتێ ،

سەربانی خانووەکانی 

تانکی نەوت و

تانکی ئاو و 

مۆلیدەی کارەبا و 

تانکی غازیان لەسەر بوو،

ئەوە وڵات نییە..

چونکە وڵات،

وەک ئۆکسجین،

ئەو شتانە دابەش ئەکات ..

کەس نایبینێ ..

نە تەنکەر ..

نە تەنەکە و دەبە و بەرمیل ..

نە بتڵە غاز ..

نە عەرەبانە و 

نە چرا  و 

گڵۆپی شەحن ..

نە دروشم و 

پیاوەتییەکانی 

سەرۆک کۆمار،

دەرناکەون..