سكۆت بێسێنت، وه‌زیری گه‌نجینه‌ی ئه‌مریكا رایده‌گه‌یه‌نێت، توندترین سزای له مێژودا به‌سه‌ر ئێراندا ده‌سه‌پێنن و رژێمی ئه‌و وڵاته ده‌ڕوخێنن.
ئاوێنه: سكۆت بێسێنت، وه‌زیری گه‌نجینه‌ی ئه‌مریكا، ئه‌مڕۆ پێنجشه‌ممه به كه‌ناڵی سی ئێن بی سی راگه‌یاند، گورزێكی دو لایه‌نه له ئێران ده‌ده‌ین، گه‌مارۆی ده‌ریاییمان له‌سه‌ر ئه‌و وڵاته هه‌یه‌و توندترین سزاشی له مێژودا به‌سه‌ردا ده‌سه‌پێنین، ئه‌وه‌ش سه‌ركه‌وتو ده‌بێت و ئه‌م رژێمه ده‌ڕوخێنین.
وتیشی، ئێستا كاتی ئه‌وه‌یه هاوپه‌یمانه‌كانمان و وڵاتانی دیكه‌ی جیهان بڕیار بده‌ن.
دوێنێ چوارشەممە، دوناڵد ترەمپ سەرۆکی ئەمریکا هۆشداری دا لە لێکەوتە ئابورییەکانی دژ بە هەر وڵاتێک کە "هەر جۆرە پشتیوانییەکی گرنگ پێشکەشی ئێران بکات"، لە کاتێکدا ویلایەتە یەکگرتوەکان هەوڵ دەدات کۆتایی بەو جەنگە بهێنێت کە نزیکەی شەش مانگ لەمەوبەر له‌پاڵ ئیسرائیلدا له‌دژی ئێران ده‌ستی پێكرد.
بێسێنت به سی ئێن بی سی وت"پێم وایە بازاڕەکانی نەوت بە هەڵە لە مەبەستی گوشاری ئابوری تێگەیشتون." ئه‌وه‌ش له‌كاتێكدایه كه ئەمڕۆ پێنجشەممە نرخی نەوت بۆ بەرزترین ئاستی خۆی لە ماوەی زیاتر لە سێ هەفتەی رابردودا بەرزبوەوە.
وه‌زیری گه‌نجینه‌ی ئه‌مریكا وتیشی "زانیاری لێكدژمان لەبەردەستدا هەیە و دڵنیا نین لە هۆکاری بەرزبونەوەی نرخی نەوت لەسایه‌ی ئه‌م بابه‌ته‌دا. ئەگەر ئێمە توندترین ئاستی گوشاری ئابوری پەیڕەو بكه‌ین، ئەوا ئەگەری زۆرە ئۆپه‌راسیۆنی سه‌ربازیی به‌رفراوان ده‌ستپێنه‌كاته‌وه."
کاتێک پرسیاری لێکرا سەبارەت بەوەی ئایا ئەگەری هەیە ویلایەتە یەکگرتوەکان چین بکاتە ئامانج بەهۆی مامەڵە بازرگانییەکانی لەگەڵ ئێران، بێسێنت وتی، پێی باشترە زۆربەی ئەم گفتوگۆیانە بە شێوەیەکی تایبەت بمێننه‌وه.
وتیشی"ئێمە دڵنیایین لەوەی هەموان دەیانەوێت گەروی هرمز دوبارە بکرێتەوەو نرخەکانی وزە دابەزنەوە. دەبێت ئەوە لەبەرچاو بگیڕێت کە چین سەدا 50ی پێداویستییەکانی وزەی لەڕێگه‌ی کەنداوەوە بەدەستدەهێنێت، بۆیە بەشداربونی به‌م ئاڕاسته‌یه بە شێوەیەکی گەورە خزمەت بە بەرژەوەندییەکانی دەکات."
به‌گوێره‌ی ئاژانسی رۆیته‌رز، داتاکانی کۆمپانیای کێپلەر بۆ شیکارییەکان لە ساڵی 2025 ئاماژەیان بەوە کردوە کە چین زیاتر لە سەدا 80ی ئەو نەوتەی ئێرانی کڕیوە کە باردەکرێت. ئەگەر ویلایەتە یەکگرتوەکان بچێتە ناو جەنگێکی ئابوریی زیاتر لەگەڵ چیندا، کە سەرچاوەیەکی سەرەکییە بۆ ویلایەتە یەکگرتوەکان بۆ کەلوپەل و كه‌ره‌سته‌كان لەوانەش کانزا دەگمەنە سەرەکییەکان، ئەوا توشی مەترسیی وەڵامدانەوەی تۆڵەسێنەرانەی چین دەبێتەوە.
پێشتر عەباس عراقچی، وەزیری دەرەوەی ئێران، لێدوانەکانی ترەمپی وەک هەوڵێک وەسف کرد بۆ لادانی سەرنجی ڕایگشتیی ئەمریکا لەسه‌ر کێشە داراییە ناوخۆییەکانی وڵاته‌كه‌ی، لەوانەش ئاستە بێپێشینەکانی قەرزەکان و بەرزبونەوەی ڕێژەی سوود.