ئەمڕۆ ملیۆنان کەس لەئەوروپا چاویان دەبڕنە ئاسمان، بۆ بینینی دیاردەیەکی سروشتی دەگمەن، بەو پێیەی خۆرگیرانی گشتی لە کاتە جیاوازەکاندا لە بەشێکی گەورەی ئیسپانیاو ئایسلەنداو گرینلاندەوە دەردەکەوێت، لەکاتێکدا لە ناوچەکانی دیکەی کیشوەرەکە (لەبەریتانیاو فەرەنسا تا بەلجیکاو سویسراو باکوری ئیتاڵیا) هاوڵاتیان توانای بینینی خۆرگیرانێکی بەشەکییان هەبێت کە لەزۆربەی ڕۆژئاوا و باکووری ئەوروپادا دەبینرێت.
ئاوێنە: ئەمە یەکەمین خۆرگیرانی تەواوەتییە کە لە ئەوروپادا لەماوەی دوو دەیەدا روودەدات لە ١٢ی ئابداو بەیەکێک لە گرنگترین رووداوەکانی ئەم هاوینە دادەنرێت بۆ گەشتیاران. ئەو خواستە زۆرە لە ئێستاوە بووەتە هۆی بەرزبوونەوەی نرخی هۆتێل و شوێنی نیشتەجێبوون، هەروەها بەرزبوونەوەی ڕێڕەوی گەشتی ئاسمانی، لە کاتێکدا گەشتە ڕێکخراوەکان بە ڕێژەیەکی پێوانەیی تۆمار دەکرێن. ڕەنگە تاکە کێشەیەک ئەوەیە کە دەسەڵاتدارانی ئیسپانیا لە ئامادەباشییەکی زۆردان بەهۆی مەترسی ئاگرکەوتنەوە لەدارستانەکاندا.
بڕیارە ئیسپانیا لە ناوەندی ئەو دیاردەیە بێت. بەشێکی زۆری وڵاتەکە لەباکوور و ناوەڕاستدا بەتەواوی خۆرگیرانی تیا دەبینرێت، کە یەکێک لەباشترین شوێنەکانی کیشوەری ئەوروپا بۆ چاودێریکردنی خۆرگیرانەکە.
حکومەتەکانی هەرێمەکانی ئیسپانیا خۆیان بۆ هاتنی تا ٦ ملیۆن کەس ئامادە دەکەن - کە بەشێکی زۆریان پێشتر گەیشتوونەتە وڵاتەکە - کە ٦٦٠ شوێنی چاودێری فەرمییان دیاریکردووە.
دەسەڵاتداران مەزەندە دەکەن کە نزیکەی یەک ملیۆن و ٥٠٠ هەزار کەس لە ڕۆژی خۆرگیرانەکەدا بەڕێگای وشکانی گەشت بکەن بۆ ناوچە گوندنشینەکانی باکووری ڕۆژئاواو ناوەڕاستی ئیسپانیا. ترسەکە لەوەدایە کە شەپۆلێکی گەورەی گەشتکردن نەک تەنها ئەگەری ئاگرکەوتنەوە زیاد بکات، بەڵکو دەتوانێت ببێتە ئاستەنگ لەبەردەم ئۆتۆمبێلەکانی ئاگرکوژێنەوەو فریاگوزاری لە ئەگەری ئاگرکەوتنەوە یان حاڵەتێکی تری فریاگوزاریدا بگاتە ناوچەکە.
هاوکات شارەزایان هۆشداری دەدەن لەوەی کە چاودێریکردنی خۆر بەبێ پاراستنی دروست دەبێتە هۆی تێکچوونی هەمیشەیی چاو. چاویلکەی خۆری ئاسایی پارێزگاری ناکات و چاویلکەی تایبەت پێویستە بۆ چاودێریکردنی مانگگیران.